Ka sorkar Meghalaya kam pat pyndon kam ia ka pisa ba dei na ka bynta karep: RM Singh

Shillong, Kyllalyngkot 06: U myntri ka sorkar pdeng ba dei peit ia ki kam rep mynta ka sngi u la plie ia ka North Eastern Regional Agriculture Fair 2018 mynta ka sngi ha ICAR, ha Umiam. U la ong ba ka ICAR kala leh bun ki kam ha kaba ia dei bad ka rep ka riang naduh ba la sdang ia ka, haduh mynta kala lah ban pynbha ia ki jaka rep ha ki 32 tylli ki jaka ha kane ka thain.

Ki jaid jingthung kiba kala lah ban leh haduh mynta ki long 56 jaid bad na kine 37 tylli ki jaid jibngthung ki dei kiba iadei bad u kba kiba la thung ha kane ka thain, nalor ki jingthung ka ICAR kala lah ban leh bun kiwei kiwei ki kam ruh ha kaba ia dei bad ka kam Ri jingri, kumka kam ri Sniang, ri Dohkha bad kine ki long ki jingjop ia kane ka jaka wad bniah ha ka rep na ka bynta kane ka thain sha tei lam mih ngi jong ka Ri India.

Na ka  liang jong u myntri ka sorkar pdeng u la ong ruh ba bun bah ki skhim kiba ka sorkar pdeng ka leh pyntrei kam na ka bynta ban kyntiew ia ka rep ka riang bad ka jingthmu ka long ban kyntiew ia ka ioh ka kot jong ki nongrep da ar shah na kaba ki juh ioh. U la ong ruh ba ha kane ka juk jingiakop ha ka pyrthei, hynrei ha ka rep ka riang ka dang don shibun ka lad ban pynbha. Ki nongrep ki lah ban kiew ha ka ioh ka kot da kaba pyndon kam ia ki kor kibor katkum kane ka juk ba mynta. Ka sorkar pdeng kala buh ia ka thong ba ha u snem 2022 ki nongrep kin ioh kamrai ar shah na ka rep.

Haba phai sha ka sorkar Meghalaya u myntri ka sorkar pdeng u la ong ba ka sorkar pdeng kala dep ai pisa T.50 lak ban ring um sha ki jaka rep ia kaba la tip kum ka micro-irrigation ia kaba ka sorkar jylla kam pat lah ban pyndonkam, na ka bynta u snem mang tyngka 2015-2016 la ai T.1.54 klur na ka bynta ban pynneh pynsah ia ka um, ia kane ka pisa ruh khlem lah ban pyndon kam ha katei ka snem.

Ha u snem 2016-17, ka sorkar jylla kam shym lah ban pyndon kam ia ka pisa T. 32 lak, na ka bynta u snem 2017-18, kala ai T. 2.2 klur hynrei kat kumka jingtip jong u ka sorkar kam pat ai jingkhien. Ban pynioh ia ki 2,09,000 tylli ki Soil Health Cards sha ki nongrep ka sorkar kala ai pisa T. 53 lakh sha ka  SHC. U la ong ba ka jylla Meghalaya kala long lypa ka jylla kaba rep khlem da pyndon kam dawai bad ka sorkar pdeng kala ai pisa T.1.59 klur ban kyntiew ia ka rep khlem da pyndon kam dawai hynrei ka sorkar Meghalaya kam pat ai jingkhein dei na kane ka daw ba ha u snem 2016-2017 la ai noh tang T.57 lak.

Na ka bynta u snem 2017-2018 la ai pisa T.1.5 klur na ka bynta ka kam rep badhaduh mynta la pynlait ia ka pisa T.80 lak tyngka. Na ka liang jong u myntri u la ong ba un behthah ia ka sorkar jylla ba kan pynsted ha kaba pyntrei kam ia ki skhim kaba dei bad ki nongrep.

 

 

What Next?

Recent Articles

Leave a Reply

Submit Comment

*