Shillong, Nailar 30; U myntri khynnah jong ka sorkar pdeng u ba dei peit ia ki kam rep kam riang bad ki kam shnong kam thaw, u Parshottam Rupala ha ka jingkren ka jong u ha ka jingialang paidbah ha Umiam mynta ka sngi ban rakhe ia ka Sankalp Se Siddhi u la ong ba ka sorkar pdeng ka pynshlur ia ki paidbah kane ka thain ban rep ia ka rukom rep kaba khlem pyndon kam sboh dawai.
Ha kane ka jingialang paidbah, u la kdew ia ka jylla Sikkim kaba la lah ban kyntiew ha ka rep ka riang khlem da pyndon kam ia ka sboh dawai bad u la ai ka jingiaroh ia katei ka jylla kaba dang ia leh mynta ban poi sha ka kyrdan kum ka jylla kaba rep khlem pyndon kam dawai sboh. Ka sorkar pdeng kan iarap ha kaba ia dei bad kane ka rukom rep.
U la ong ba ki jaid soh kiba rep khlem da pyndon kam ia ka sboh dawai, kum u soh Niamtra, Sohtrun, ki Syntiew lah ban die ia ki ha ki iew kihat ha ka rukom kaba biang. Ka jingpynlong ia kum kane ka jingialang Sankalp Se Siddhi ka long ban pynshlur ia ki nongrep ba ka rukom rep kan kiew arshah ha u snem 2022.
U myntri khynnah ba deipeit ia ki kam lynti rel ha ka Ri u Rajen Goghain u la ong ba ka dei ka jingangnnud jongu myntri rangbah duh jong ka Ri India u Narendra Modi ban wanrah biang ha ka sien kaba ar ia ka jingjyrngam ha ka Ri khamtam ha kane ka dong shatei lam mih ngi jong ka Ri India. U la ong ba u dei na kane ka thain bad u tip ia ka jingdon ia la lad ka lynti ha kane ka dong bad ka thain.
Naka liang jong u myntri ka sorkar pdeng u la kubur ba ka jingbym biang ki lynti syngkieng kala wanrah ia ka jingeh ha ka kit ka bah ia ki mar ba pynmih na kane ka thain. La ong ba baroh ki jylla kin pyniasoh bad ka nongbah Delhi lyngba ka Lynti rel. Kane kam dei ba ka iarap ha ka leit ka wan hynrei kan iarap ia ki nongrep ban die ia ki mar rep ka jong ki.
Na ka liang jong u myntri u la ong ba lada don ka lynti rel ha Meghalaya kan iarap ban ai kam ai jam bad kan kyntiew ruh ia ka jngohkai pyrthei. Na ka liang jong u myntri u sngewkhai jur ia kane ka jingslem ban pyndep ia kane ka Lynti rel ha Meghalaya, ia kane lah ban ia pynbeit da ka jingiamir jingmut lang da baroh ki kynhun.
