Shillong, Iaiong 20: U myntri khynnah ba dei peit ia ka ministry pynmih bor ding jong ka sorkar pdeng ryngkat u myntri rangbah ka jylla Meghalaya u Conrad K Sangma mynta ka sngi ha ka jingiadon lang u myntri ba dei peit ia ki kam bor ding ka sorkar jylla kila plie paidbah ia ka skhim Pradhan Mantri Sahaj Bijli Har Ghar Yojana (Saubhagya) ha ka jingialang paidbah kaba la long ha U Soso Tham Auditorium.
Ha ka jingkren jong u myntri ka sorkar pdeng u RK Sing u la ong ba kane ka skhim ka dei ka skhim kaba ka sorkar pdeng kala pyntrei kam da ka jingthmu ban wanrah ia ka ki jingkylla hapoh jong ka Ri baroh kawei bad ka sorkar pdeng ka kwah ban iohi ba baroh ki shnong ha ka Ri India kin ioh ka ding eletrik bad kaba kongsan eh kan long ia kito ki long iing kiba duk ba rangli.
Ha jingkren jong u myntri rangbah ka jylla u Conrad K Sangma u la ong ba kane ka skhim ka long kaba myntoi haduh katta katta bad na ka liang jong ka sorkar jylla kan peit ba kane ka skhim kan poi sha ki paidbah, sha ki shnong ki thaw kiba ym pat ioh ia ka ding eletrik. Ha kane ka sngi u myntri rangbah u la ong ba don kam ban wad ia ki lad ki lynti kumno ban pynmih ia ka bor ding eletrik ha ka jylla.
Ha kane ka sngi la sam ia ki jingiarap sha ki 30 tylli ki long ioh ki ban sa ioh ia ka bor ding eletrik lyngba kane ka skhim. Kiwei kiba la ia don lang ha kane ka sngi ki long u Chairman, ka Meghalaya Industrial Development Corporation Ltd (MIDC), u Rupert M Momin, Joint Secretary ka tnad pynmih bor ding ka sorkar pdeng u Dr. A.K Verma, u Additional Chief Secretary ka sorkar jylla ba dei peit ia ka MeECL, u Bah P.S Thangkhiew, u Additional Chief Secretary ba dei peit ia ka tnad bor ding u M.S Rao bad u CMD ka NEEPCO, u Bah AG West Kharkongor and others.
