Shillong, Jymmang 29: Ka myntri jong ka sorkar pdeng ka Smriti Zubin Irani kaba dei peit ia ki kam thain jain ha kane ka Ri India mynta ka sngi kala wan sha Shillong bad ha ka jingkren ka jong ka kala ong ba ka sorkar pdeng kala leh bun ki kam na ka bynta ban kyntiew ia ki nongthain jain ha kane ka Ri India.
Ka myntri jong ka sorkar pdeng kala ong ban pynsuk ia ki nongthain jain ka sorkar kala pyntrei kam ia ka skhim ban thied ia ki kynja ksai ba ki nongthain jain ki hap ban siew tang 10% katba ka sorkar pdeng kan siew 90% kane ka jingiarap ka long ban kyntiew ia ka ioh ka kot jong ki nongthain jain.
Ka myntri kala ong ba ia kane ka jingiarap kaba ka sorkar pdeng ka ai sha ki nongthain jain ka long beit na sorkar pdeng sha ki trai ki ba thain ia ki jan kam leit sha ei sha ei ruh bad ia kane la pyntrei kam lyngba ka “ Direct Benefit Transfer” ia kaba la tip kum ka DBT, la leh ia kane ka long ban weng ia ka jingeh jong ki briew kiba don ha pdeng.
Ka sorkar pdeng kala buh ruh ia ka number na ka bynta ba ki nongthain jain ki lah ban phone haba kim ioh ia ki ksai. Lada ki nongthain jain kim ioh ia ki ksai ki dei ban pyntip bad hapoh 48 kynta dei ban pynbeit ia ka jingeh kane ka long ba ka sorkar kala shim khia ban kyntiw ia ki kam thain jain ha ka Ri India.
Ka myntri kala ong ba ka don ka jingdawa kaba jur bha ia ki jain ba la thain da ka kti ha ki iew jong ka pyrthei bad ki jain kiba la thain ha Assam la pyndon kam da ki briew kiba don ha New York jong ka Ri America. Ka sorkar pdeng ka la plie bun ki lad ki lynti kumno ban pynkiew ia ki nongthain jain.
