Shillong, Jylliew 28: U myntri jong ka sarkar jyll
a u Bah Metbah Lyngdoh u la ia kynduh ia ki briew jong ka sorkar kiba don hapoh jong ka South Garo Hills District ban ia kren halor ki skhim kiba ka sorkar kala pyntrei ha kane ka District, ha ka jingiadon lang u MLA jong ka Siju-Rongra U Rakkam Sangma, MLA jong ka Chokpot u Lazarus Sangma bad u Em jong ka GHADC u Sengnal Sangma.
Haba kren ha kane ka jingiakynduh ban ia mir jingmut ha kaba ia dei bad ki skhim kiba la pyntrei hapoh jong ka District, u Bah Metbah u la ong ba ka jingpynlong ia kum kine jingialang ka long, ym ban ia wad daw wad dong hynrei ban wanrah ia ka jingjingtrei kam jong ka sorkar kham jan sha ki paidbah bad ban pynlong ia ki jingtrei baroh kiba dei ban iatip paidbah bad ban don ia ka jingkitkhlieh ia ka kam.
Da kaba khot ia kum kine ki jingialang ka long ban ia tip baroh ia ki jingeh kaba ia kynduh bad ha ka juh ka por ban wad ki lad ki lynti kumno ban weng ia kine ki jingeh na ka bynta ka jingmyntoi jong ki paidbah. Ha kane ka jingiakynduh lang baroh ki shnat sorkar kiba hapoh jong ka District kila ia wan lang.
Ki jingiakren kiba ha khmat eh ha kane ka jingiakynduhlang ki long, ki surok, ka jingbym biang jong ki Bank, ka jingbym biang kila phah khubor ha ka liang jong ki mobile bad ki telephone bad kiwei ki skhim kiba dei jong ka sorkar pdeng bad jong ka sorkar jylla kiba la pyntrei hapoh jong ka District.
Ki MLA na kane ka District kila pynsngew sha u myntri jong ka sorkar jylla ia ka jingeh ha kaba ia dei bad ka jingbym biang ka bor ding eletrik, ka umbam umdih, ka jingsniew palat jong ka surok bah NH-51 bad NH-62 kiba dei ki surok ba don kam tam hapoh jong ka South Garo Hills.
Ha ka jingkren jong u MLA ka Siju –Rongra u Rakkam Sangma u la ong ba ki ophisar ki dei ban shim ia kane ka lad ban ia kren ym ban pynpaw tang ia ki kam kiba bha ba ki la leh hynrei ki dei ban kren shai ia ki jingeh kaba ki ia kynduh haba pyntrei kam ia ki skhim jong ka sorkar kaba la pynlong ia ki skhim ba kin sep ei khnang ba ka sorkar kan lah ban weng ia ki jingeh. U MLA jong ka Chokpot u Lazarus Sangma u la ong ba ka sorkar ka dei ban wad ki lad ki lynti ban wanrah ia ki kam pynroi ha South Garo Hills.
Ha ka jingkren jong u Deputy Commissioner jong ka South Garo Hills u Hubert Marak , ha khmat jong u myntri jong ka sorkar jylla u la iathuh ia ki jingeh kaba ki ia kynduh bad u la ong ruh ba ka South Garo Hills District ka dei ka District kaba ki briew ki kair ban leit, ha kane ka jylla Meghalaya. U la ong ba da kane ka jingiakynduh yn wad ki lad ki lynti kumno ban weng ia ki jingeh.
Ha kane ka jingialang u myntri ka sorkar jylla u Bah Metbah Lyngdoh u la shah skhor bha ia kaei kaba ki la ia kren bad u la ong ba ka sorkar ka don ia ka jingthmu ban wanrah ia ka roi kaba sha baroh ki District kaba mar ia ryngkat na ka bynta ka roi ka par jong ka jylla.
