Shillong, Nailar 31: Ka state security commission, mynta ka sngi kala ia shong ban pynkhreh na kabynta ban wad ia u heh pulit ban long u Director General ki pulit ka jylla, namar u SK Jain IPS u ba bat mynta u long shipor. Ha kane ka sngi kane ka Commission kala ia kren ruh bun kiei kiei kiba ia dei bad ka shong suk shong sain ha ka jylla.
Haba kren ha ki nongthoh khubor ha dien ka jingialang na ka liang jong u myntri rangbah kajylla u Dr Mukul Sangma u la ong ba kane ka jingiakynduh mynta ka sngi ka long ba ka SSC, kala shong ban ia kren ia kiba bun kikam kiaba ia dei bad ka shong suk shongain ha ka jylla ba da ka juh ka por ban peit kumno ban leh ha kaba ia dei bad u DGP ba thymmai ha ka jylla.
La ong, haba peit na ki jingjia ha ki por kiba la dep, haba ka sorkar ka jid ia u briew bun na kine ki heh pulit kim treh ban pdiang ia kane ka kam, ban pynlait ia kine ki jingeh ka SSC mynta ka sngi kala rai ban thoh sha baroh kito ki heh pulit kiba la dei ban kiew sha kane ka kyrdan hato kin pdiang ne em ia kane ka kam.
Lada ki pdiang ki hap ban ai ia ka jingthoh sha ka sorkar bad ka sorkar kan sab uh ha khmat jong ka SSC ban jied ia ki briew kiba la biang ban poisha kane ka kam katkum ka ain Police Act, na pdeng ki heh pulit kiba la pynpaw ba kin kloi ban long ha kane ka kyrdan DGP ka SSC kan sa jied ia u wei na peng jong ki ban long u DGP ba pura.
