Shillong, Risaw 22: Ka National Accreditation Board for Hospitals and Healthcare Providers (NABH) kala ai jingithuh ïa ka Supercare Hospital, Shillong ha Meghalaya bad ha ka Ri India baroh kawei ka dei kaba 1035 kaba la ioh ia katei ka kyrdan.
U Bah Damien Marwein la iathuh ba ka NABH ka dei ka kynhun jong ka Quality Council of India (QCI), bala buh ban pynlong bad khmih ïa ki jingai jingithuh ïa ki jaka ai jingsumar.
Ka NABH ka dei ka dkhot jong ka International Society for Quality in Health Care (ISQua). Ki hospital ba ïoh jingithuh na ka NABH ki ïoh jingithuh ha kylleng ka pyrthei. Ki kyrdan ba buh da ka NABH ki dei mynta ki kyrdan khmih ba biang tam ïa ka rukom treikam ki hospital ha India.
Ki don artylli ki kyrdan rukom khmih ïa ki hospital allopathic: kawei ka dei ka Full NABH, kaba ïahap ïa ki hospital ba ai jingsumar ba kyrpang ne speciality bad ki hospital ba sumar kham kyrpang shuh shuh ne ki tertiary care, bad kawei pat ka dei ka Entry-level NABH, kaba khmih ïa ki hospital ba kham rit ki bym don ïa ki jingdonkam ba ïahap bad ka kyrdan Full NABH.
Ka Supercare Hospital kala ïoh ïa ka jingithuh NABH Entry-Level ha ka 5 tarik u Risaw 2021, bad kala ïoh ïa ka jingithuh ba pura, ka Full NABH ha ka 29 Nailur 2022. Kane ka jingithuh kan treikam haduh ka 30 tarik u Nailur, 2026. Kiba wan phah sumar ki dei ki nongïoh jingmyntoi bakhraw tam na ka jingithuh Full NABH bad ka Entrylevel, namar ba ka wanrah ïa ka jingsumar ba bha bad ka jingshngaiñ ïa kiba shah sumar.
Ki nongpang ki ïoh jingsumar na ki nongtrei bala shah hikai pyntbit. Ïa ki hok jong ki nongpang la burom bad ïada. Ïa ka jingsngewhun kiba phah sumar la khmih na ka por sha ka por. Kine ki jingai jingithuh ïa ka rukom treikam ka hospital ki ai jingmyntoi ïa ki nongtrei ka hospital namar ki ïai ïoh jinghikai, ka jaka trei ruh bad ka jinglong nongialam ka kham bha, bad nalor kine, ka jinglong trai ïa ki rukom sumar.
Ka Supercare Hospital ka dei kaba nyngkong bad tang ma ka ka hospital ha Meghalaya ban ïoh jingithuh Full NABH. U nongseng bad Managing Director, u Dr. R. S. Thangkhiew u ngeit ba ka jingïoh jingithuh na ka NABH ka pynkhlaiñ ïa ka jingiohi jngai jong ka Supercare Hospital.
“Ban buh ïa ka rukom treikam ba bha ha ka jingsumar, ka jingpynkoit bad ka jingsuk” bad kumjuh ka mat treikam ka hospital: “Ban pynbiang ïa ka jingsngewthuh ban don beit ka jingpynkoit ïa ki nongpang bad ki longïing jong ki bad ban pynbha ïa ka rukom im ïa baroh ki briew ha ka imlang sahlang.”
U Dr. Thangkhiew, ryngkat bad ka kynhun, ki kwah ban ai sha ki briew ka Meghalaya bad ka thaiñ shatei lam mihngi ka India ïa ka jingsumar ba lah ban shem ha baroh ki jaka sumar ka juk ba mynta ha kylleng ka ri bad ka pyrthei.
Ka khubor jong u ka long kaba shai haba ula ong, “Man ba ïaid ki aïom, ngi pynïoh ïa ki tiar sumar ba katkum ka juk ba mynta bad ngi khot ïa ki nongsumar ba tbit tam.
Ka Supercare ka thmu ban long ka nongtbeh jingshai ha ki rukom sumar ba thymmai, ki lad bad ki jingpyrkhat ba ïadei bad ki jingshakri ha ka koit ka khiah, bad ha kajuh ka por ki pynthikna ba ki nongrim ka jingsumar kin long ka bor jong ngi.
