Shillong, Nohprah 18: U Myntri Rangbah duh u Narendra Modi bad u Myntri sorkarpdeng ba dei khmih ia ki tnat Kam pohiing bad Cooperation u ShriAmit Shah ki la iashim bynta ha ka jingrakhe Golden Jubilee jong ka North-East Council, ha nongbah Shillong ha Meghalaya mynta ka sngi.
Ha kane ka jingialang, bun ki kynrem ki lyndan ba kynthup ia u Lat ka jylla Meghalya, Governor Brig. (Dr) B. D. Mishra, u Myntri Rangbah ka jylla Meghalya u Conrad Sangma bad ki Myntri Rangbah jong ki jylla ka thain shateilammihngi ki la iadonlang.
U Myntri sorkarpdeng u la ong ba ha ka jingialang ba dang shen jong ka North- East Council (NEC) ba la pyniaid da u Myntri Rangbah duh, u Narendra Modi, u Myntri Rangbah duh ym tang ba u la iaroh ia kam ba la leh ha ki 50 snem ba la leit ha ka North-East Council.
U myntri rangbah duh jong ka Ri India u la bthah ruh ka jingpynkhreh ia ka blueprint jong baroh ki bynta jong ka roi ka par jong ka thain shateilammihngi ha ki 25 snem ban wan bad ban buh ia ki thong. Mynta, hapoh ka jingialam jong u Myntri Rangbah duh, u Narendra Modi, ka thain shateilammihngi ka iaidshaphrang ha ka lynti jong ka shongsukshongsain bad ka roi ka par.
U Shah u la ong ba mynshuwa ka jingmang pisa sha ka thain shateilammihngi kam poi sha baroh ki bynta hynreihadien ba u Narendra Modi u la long Myntri Rangbah duh ka ri, ki jingmang pisa ki la poi sha ki shnong bad la pyndonkam na ka bynta ka roi ka par, bad kane kalong ka jingjop kaba khraw.
U la ong ba u Myntri Rangbah duh u ju phaikhmat kyrpang sha ka thain shateilammihngi. U Myntri Rangbah duh u la wan jngoh ia ka thain shateilammihngi palat 50 sien ha ki 8 snem ba la leit, katba ki Myntri ruh ki la wan jngoh ia ka thain shateilammihngi palat 400 sien.
U Myntri sorkarpdeng ba dei khmih ia ki tnat kam pohiing bad Cooperation u la ong mynshuwa ka roi ka par jong ka thain shateilammihngi ka sahkut namar ka jingduna ka jingmang pisa sha ka North- East Council, hynrei u Myntri Rangbah duh u la saindur thymmai bad wanrah ka bynta ba thymmai ha kaba iadei bad ki jingdon jingem jong ka thain shatei lam mihngi.
Ban leh ia kane ka long da kaba sdang ia ki projek ba heh ha ka kyrdan jong ka sorkarpdeng. Namar ka jingkiew ha ki jingdon jingem, ki kam jngoh ruh ki la kiew ha ka thain shateilammihngi, kumjuh ruh la plie bun ki karkhana baritbaria, ki jaka pule bad ki jaka ba iadei bad ki kam ialehkai. U la ong ba u Myntri Rangbah duh u la sdang ruh ia ka projek ban pyniasoh ia man ka nongbah jong ki jylla ka thain shateilammihngi da ki surok kali, rel bad liengsuin.
U Myntri sorkarpdeng u Amit Shah u la ong dei namar ka jingialam jong u Myntri Rangbah duh, ka thain shateilammihngi mynta ka lait na baroh ki jingiakajia bad ka shongsukshongsain ka la don ha ka thain.
Haduh phra snem mynshuwa, ia ka thain shatei lam mihngi la bna tang ka jingdon ki jingpakhang, ki jingiakhih, ki jingjiabthei bomb bad ki jingiasiat bad ki briew jong ka thain shateilammihngikim lah ban im suk im sain namar ki kam pyntriem jong ki kynhun kiengatiar bapher bapher.
Ha ki phra snem ba la leit ka la don ka jingduna 74% ki jingjiapyntriem ki lehnoh, ka jingduna 60% ki jingjia thombor ia ki kynhun shipai bad ka jingduna 89% ka jingiap ki riewpaidbah, katba kumba 8,000 ngut ki samla ki la wan pyndem bad iasoh bad ka imlang sahlang.
U Shah u la ong ba kine kilong ki jingjop bakhraw kiba la lah ban urlong namar ka jingialam u Myntri Rangbah duh u Narendra Modi bad khlem ka shongsukshongsain ym lah ban wanrah ia ki kynhun kiba wanrah ia roi ka par, ka pule puthi bad ka koit ka khiah.
U Shah u la ong ba ha ka por jong ka jingialam u Myntri Rangbah duh u Narendra Modi, la mynjur ia ka jingiasoisoskular bad ka NLFT ha u 2019, ka jingiakut bad ki Bru bad Bodo ha u 2020 bad ka jingiakut bad ki Karbi ha u snem 2021 ki dei kiba la pyndep.
Ki jingiakajiapud hapdeng ka Assam- Meghalaya bad Assam- Arunachal ruh ki la jan poi sha kaba kut, bad namar ka jinglahpynneh ia ka shongsukshongsain, ka thain shateilammihngi ka la iaid sha ka lynti jong ka roi ka par.
Ka nuksa kaba khraw tam jong kane kalong ba mynshuwa ka ju don ka jingdawa ban weng ia ka AFSPA na ka thain shateilammihngi, hynrei mynta ka jingdawa kam don shuh, namar ka sorkar India ka la shim ia ki sienjam ban weng ia ka AFSPA.
U la ong mynta 60% ka jaka jong ka Assam, hynniew tylli ki distrik jong ka Nagaland, 15 tylli ki thanat ha hynriew tylli ki distrik jong ka Manipur bad Tripura bad Meghalaya ki la lait pura na ka AFSPA, katba ha tang kawei ka distrik ha Arunachal ym pat weng ia ka AFSPA.
U Myntri Kam pohiing jong ka sorkarpdeng u la pynpaw ka jingngeit skhem ba ka NEC bad ki Myntri Rangbah jong ki Jylla ka thain shateilammihngi kin trei da ka jingkut jingmut ban pynurlong ia ki thong ba la buh na ka bynta ka NEC da u Myntri Rangbah duh, u Modi ban iarap ban kyntiew ia ka thain bad ban wanrah ia ka thain shateilammihngi kaba la kiew, kaba shongsukshongsain bad kaba plie ki lad ioh kam kumba long kiwei ki thain jong ka ri.
