Shillong, Risaw 10: Mynta ka sngi ka seng Hynniewtrep A’chik National Movement (HANM) kala pynskhem ia ki nongkit kam jong ka ba dei ia ka South Eest Khasi Hills District ha ka jingialang kaba la long ha Mawmluh, Sohra, ia ki nongkit kam la pynskhem da u president ka seng u bah Lamphrang Kharbani.
Ha ka jingkren jong u kum u khlieh jong ka seng u la ong ba ka thong kaba ha khmat eh jong ka seng ka long ban dawa na ka sorkar ba shuwa u snem 2023 ka sorkar ka dei ban plie noh ia ka South East Khasi Hills District ka ban kyntup ia ki lai tylli ki konstitwensi, ka Pynursla, Sohra bad ka Shella.
U la ong ba ka thong jong ka seng kaba ha khmat eh ia kaba la pynskhem mynta ka sngi kan long halor kane ka nongrim namar lada la ioh ia ka District kan iarap ia ki paidbah kane ka thain, ym tang ha ka ioh kam ioh jam hynrei ha kiba bun ki liang baroh ha ka jingdon kam jong ki paidbah.
U la ong ba ki dkhot jong ka seng ki dei ban sngewthuh ka long ba ka nongrim jong ka seng HANM, ka long ba iada ia u pud u sam, ban iada ka ka khyndew ka shyiap bad ia ka khaii pateng na ka jingshah knieh noh ha kiwei pat. Ka jingdon jong ka seng ha kane ka thain khappud bad ka Bangladesh ka long ban peitngor ia kane ka thain baroh kawei.
Kiwei kiba la kren ha kane ka jingpynskhem ia ki nongkit kam ka seng ki long u bah K Thongni Vice President, u bah Lurshai Rympei, bah Cyprian Dkhar General secretary ka seng, ia ka jingialang la pyniaid da u bah BK Khongmawpat bad la kren ai khublei da u Bah B M Kharwanlang.
Ki nongkit kam jong ka seng HANM jong ka SEKH District ki long u bah Comet Star Lyngdoh kum u President, u bah Priemly Ryngksair kumu Vice President, bah BK Khongmawpat kum u General secretary bad 18 ngut kiwei ki nongkit kam ka seng hapoh ka Executive Committee.
