Shillong, Naiwieng 14: U Director jong ka Travel bad Tourism Bazaar u Amit Biswas u la ong ba ia kane ka tamasa kaba lai sngi lynter kan sdang ha Shillong la shai ka sngi, ha All Saint Hall, ha IGP. Ka jingthmu jong kane ka tamasa ka long ban ailad ia ki briew ba kin ioh ia ka jingtip kaba bniah haba ki kwah ban leit shangkai pyrthei.
Haba kren ha ki nongthoh khubor mynta ka sngi ha Shillong Press Club na ka liang jong u Biswas u la ong ba, haduh mynta ia ka jylla Meghalaya ym pat plie sha ka pyrthei ia ki jaka jngohkai kiba itynnad, ka dang long tang ka Sohra, Mawlyngong bad ka sor Shillong, hynrei dang don bun bah ki jaka kaba ki briew kim pat tip ia kine ki jaka.
Ka jingpynlong ia kane ka “Travel bad Tourism Bazaar” ha kane ka nongbah Shillong , ha kaba bun kiwei ki jylla kin wan ban ia shim bynta ka long ban ai kalad ka kabu ia ki briew jong kane ka nongbah Shillong ba kin ioh ia ki jingtip ki ba bniah na ki briew jong ki sorkar jylla kibapher bapher kiban wan ia shim bynta ha kane ka tamasa.
Na ka liang jong ka TTB ia pynlong ia kum kine ki tamsa tang ha ki lai tylli ki jaka haduh mynta kata, ka Nongbah Shillong, Ha Kolkatta bad ha Ranchi jong ka jylla Jharkhan. Da kaba pynlong ia kum kine ki tamasa ki briew ki ioh ia ka jingtip kaba bniah sha ei ban leit bad ha ka por kaba kumno ki lah ban leit ban iohi ia ka jingitynnad jong kano kano ka jaka.
