Shillong, Naitung 24: U Bah Pyniaid Sing Syiem Deputy Chief Executive Member hapoh jongka KHADC haba jubab ia ka jingkylli jong u Bah L Blah nongialam ka liang pyrshah u la iathuh ka jingiabhah ia ka khajana ia ki mar poh khyndew hapdeng ka sorkar bad ka District Council ia ki mar ki khlaw kiba rit ka long hapdeng 60% bad 40%.
Ka District Council ka ioh 60% bad ka Sorkar jylla ka ioh 40%, ia u dewiong pat ha ka por ba ki primary skul ki dang don hapoh jong ka KHADC ka jingiasam ka long 75% sha ka District Council bad 25% ka shim ka sorkar jylla hynrei ha dien ba ka sorkar kala shim noh ia ki skul la pynkylla ha kaba ki District Council ki ioh noh 25% bad ka sorkar jylla ka ioh noh 75%.
Ha ka jingbubab ia ka jingkylli bynrap jong u nongialam ka liang pyrshah u Bah Pyniaid ula iathuh ba ia ka pisa kaba la ioh kum ka khajana na ki marpoh khyndew ka District Council ka plut ha kaba siew ia ka tulop jong ki MDC bad kum juh ia ki nongtrei baroh kiba don 800 duna bad ha ka shibnai ka jingsiew kala kot sha ka saw klur tyngka.
Na ka liang jong u EM ba dei peit ia ki marpoh khyndew u Bah Mitchel Wankhar halor ka jingkylli da u nongialam ka liang pyrshah hato ia kane ka pisa lah ban ia skhim ne em ia ki MDC u Bah Wankhar u la ong ba ia kane kin sa ia kren hapoh jongka executive Committee.
Ha kawei pat ka jingkylli kaba la wanrah da u Bah L Blah ha kaba ia dei bad ki ar tylli ki Hima, ka Sohiong bad ka Sohra, u Bah Pyniaid u la iathuh hapoh ka iing dorbar ba ka EC la shai ka sngi kan sa wanrah da ka kaiphot ha kaba kin sa ioh ban ia kren kham bniah.
