Shillong, Jylliew 25: U Deputy Chief Executive Member hapoh jong ka KHADC u Bah Gigur Myrthong haba jubab ia ka jingkylli u Bah PN Syiem haba ia dei bad ka jingioh lum khajna u la ong ba ha u snem 2019-2020 ka jingioh lum khajna ka long T. 17,87,13,074/- tyngka.
Haba jubab ia ki jingkylli bynrap la iathuh ba tang na ka tnad khyndew kabai register jaka ka long T.25,54,669/- tyngka, na ka tnad khlaw pat ka long T.2,35,68,611/- tyngka, ka bai Trading License ki ioh T.1,68,62,117/- tyngka. Ka bhah na ki marpoh khyndew Major ka long T.1,53,29,855/- tyngka katba na u Minor ka long T. 5/- klur tyngka.
Haba jubab ia ka jingkylli bynrap jong u bah RV Lyngdoh haba ia dei bad ka jinglut ia ka tulop ha KHADC, u Deputy CEM u la iathuh ba ha ka shibnai ka jinglut ka long T.4.5/- klur bad ha ka shisnem kala kot sha ka T.54 /- klur.
Haba ia dei bad ka bhah kaba dei na ki marpoh khyndew u Deputy CEM u la ong ba ka sorkar kam juh ai ia ka jingkhein kaba shai, na ka liang jong ka Council mynta kan ia kynduh ia ka sorkar ban pan ia ka jingkhein kaba biang haba ia dei bad kane ka khajna.
Haba ia dei bad ka jingkylli u bah Gabriel Wahlang halor ka bhah jong ki marpoh khyndew, u Deputy CEM u la ong ba ia ka bhah na ka bynta ki marpoh khyndew ia u Minor ka long ha ka ratio 60:40 katba ia u Major ka long 75:25.
