Ka  TUR na Meghalaya kala ai da ka jingmudui pyrshah ia ka CAA ha Supreme Court

Shillong, Kyllalyngkot 16: Ka seng “ Thma U Rangli-Juki” kila pynpaw ba kila dep ban buh ka jingmudui da ka PIL ha Supreme Court ban pyrshah ia ka ain CAA 2019 ha ka 13 tarik Kylla lyngkot 2020. Ha kane ka jingmudui katei ka seng kala kdew ba ki don haduh 17 tylli ki phang kiba long pyrshah ia ka Riti Synshar jong ka Ri.

Ka jingmudui ba ka CAA ka long pyrshah ia ka Riti synshar ka Ri, ia ka Ain CAA 2019 bad ia ka jingpyntreikam ia ka CAA 2019 kaba la notify ha ka 10.01.2020

Ka TUR ka  mudui pyrshah ruh katkum ka Riti Synshar ka Ri ia ki notification/order ka Sorkar pdeng kiba ka la pynmih kumne, G.S.R 686 (E) Dated 7.9.2015, G.S. R 702(E) Dated 18.7.2016 and GSR 703 (E) dated 18.7.2016.

Ha ka jingmudui ka TUR ka kynnoh ba Ka CAA 2019 ka long pyrshah bad pynkhein ia ki hok tynrai ba la pruid dak ha ka Riti Synshar, kum ka hok ban long mar ryngkat ha khmat ka Ain (art 14) ka hok ban long laitluid bad im laitluid (art 21) ,ka hok ban ngeit blei ban mane blei laitluid (art 25) bad ka hok ban im jar jar bad kyrpang tang marwei hi (right to privacy kaba la pynbna dang shen da ka SC).

Ha ka jingmudui ka TUR kala kdew ruh ba ka CAA 2019 namar ba ka long pyrshah ruh ia ka hok tynrai jong ki tribal kaba kynthup ruh ia kito kiba shong ba sah ha Ri Bangladesh, kum ki Khasi-Jaintia, Garo bad kiwei de kiba bun kiba im bad shong shnong ha Bangladesh.

Ka CAA 2019 kam shym pyrkhat ei ei ia ki jingshisha jong ka jingim kiba don ha ki thain khapppud hapdeng ha Meghalaya bad Bangladesh bad ha ki Jylla ka thain shatei lam mihngi kiba ia khap bad ki Ri kum ka Bangladesh, Mayanmar, China, Bhutan. Ki jingshisha ba kumno ki kur ki kha ki paradoh para snam ki ia im,iatrei iaktah bad ia imlang sahlang ha baroh ar liang jong u pud u sam.

Ka CAA 2019 kam pyrkhat ei ei ruh em bad kam suidniew ia ki jingshisha jong ngi kiba im ha ki thain khappud bad ka Bangladesh. Ki khasi (niam tynrai)i, ki pnar (niam tre) bad ki Garo (songsarek) kiba bun kiba im bad shong shnong ha Bangladesh ki dang bat bad mane blei katkum ka niam tynrai bad kim don jingiadei ei ei bad kiwei pat ki hynriew tylli ki niam kiba la kdew ha ka CAA 2019. Kumta ka Ain CAA 2019 ka lah shilliang bad ka kyntait ibein ia ki par kur para kha kiba don ha ka niam tynrai.

Ka TUR ka ong ba dei ban  sngewthuh shai ba ia ka jingiadei kur dei kha bad dei para ri jong ngi kiba im ha India bad Bangladesh la pyniakhlad jubor da u pud bad u lain ba la dro ha ka por ba ka Sorkar Bilat ka ieh noh ia ka jingsynshar jong ka.

Ka jingiadei para kur para kha bad para ri ka neh hynrei ka jingeh ka mih ba la dro noh ia u lain ba ngim lah shuh ban tam pud. Mynta pat sa kane ka ain CAA 2019 ka ba pynpait, pharia bad phiah shuh shuh ia ngi bad kaba lah shilliang bad long shilliang khmat.

Ka TUR ka ong ba kum ki nongmudui ki artatien shibun ia kane ka Ain CAA 2019 ba ka lah ban long ba ka mih na ka jingthmu barieh jong ki seng/kynhun shitniam Hindu kiba angnud ban pynkylla ia ka Ri India kum ka Ri Hindu bad ban pynbor ia ki para kur para kha bad ia kiwei ban pynithuh noh ia lade bad ka niam Hindu.

Haba la thaw ia ka ain ban long nongshong shnong ka Ri India ha ka snem 1955 ki nongthaw ain ha kito ki por kim shym la shah satia ba ka niam kan dei ka nongrim namar ba ka ialong pyrshah bad ki nongrim tynrai jong ka Riti Synshar ka Ri.

Ha ka jingmudui ka TUR kala kdew ba ka CAA 2019 ka pykhein bad long pyrshah ia ka Right to Privacy jong ki khasi ki Jaintia ki Garo, kiba dang bat bad ngeit Blei ha la ki jong ki niam tynrai, kiba wan rung shong shnong na Bangladesh sha Meghalaya India namar ba kim dei napdeng kito ki hynriew tylli ki niam ba la jer ha ka Ain.

Kine kim lah ban ioh long nongshong shnong satia wat la ki wan phet ne wan rung na Bangladesh. Ha kajuh ka por ka jingpyllait noh na kane ka ain CAA 2019 na ki jaka kiba hap hapoh ka sixth schedule ka khanglad bad buh jingeh ia kiwei pat ki para khasi_Jaintia bad Garo kiba wan rung shong shnong ne wan phet na Bangladesh ban ia im lang para ri para kur para kha.

Ka CAA ka khang ia ki ban ioh long nongshong shnong ka Ri India lait sa tang lada ki wan shong shnong ha ki bynta kiba hap hapoh ka Normal Area ka Shillong Municipality. Kumta ka Ain CAA 2019 ka long tohmet, ka leh shilliang khmat bad ka khein dewthala ia ki hok jong ki Khasi, Jaintia bad Garo.

Kumta kum ki nongmudui ki shem ba ka Ain CAA 2019 kam lah ban ieng bad kam don nongrim ban ieng, ka pynkhein bad khein dew thala pynban ia ki rit paid tribal kaba mut ki Khasi, Jaintia , Garo bad kiwei de ki rit paid.

Ki kyndon kum ka Sixth Schedule bad kiwei kiba don ha ka Riti Synshar ka Ri ki kren shai halor ka jingiada ia ki Tribal bad ki ai ruh ka bor ban iada, pynneh pynsah bad kyntiew ia ka jingim ki tribal kum ka kolshor, ka ktien, ka khyndew ka shyiap bad kumta ter ter. Hynrei ka Ain CAA 2019 kam khein snep ia kine baroh bad ka pyrshang pynban ban knieh noh na ngi ia ki hok jong ngi bad ban pynduh pyndam shi syndon ia ngi na sla khyndew.

Ym dei tang ma ki khasi, Jaintia bad Garo kiban shah ktah na kane ka Ain CAA 2019, hynrei kiwei ruh ki tribal ne rit paid kum ki Rabha, ki Hajong, Chakma, Kuki bad kiwei kiba mad ia ki jingeh ha ki Ri kum Bangladesh bad Myanmar.

Kumta kum ki nongmudui ngi duwai bad kyrpad hakhmat ka iing shari ba don burom ka SC ban pynbna ba (a) ka Ain CAA 2019 ka long pyshah bad pynkhein ia ka Riti Synshar ka Ri bad (b) Ban ai ka hukum katkum ka Article 142 ba ka Sorkar India ka dei ban don noh ki kyndon kiba shai, ba biang bad paka ban pynbeit ia ki kam phet wir.

Ban weng ia ki jingeh ba ki nongphet wir ki iakynduh bad ruh ban iarap bad iada ia ka Ri India na kane ka jingeh. Bad kine ki kyndon ki dei ban long ki bym lah shilliang bad ki bym leh shilliang iano iano ruh, ki dei ban long katkum ki nongrim jong ka hok longbriew man briew bad ka sain pyrkhat synshar paidbah bad kidei ban long ki shai bad ba beit khnang ba kan wanrah ia ka jingbha bad jingmyntoi ia baroh lang.

Ka Tur ka kwah  ruh ban pynpaw ia ka jingsngewkhia kaba jur ba kane ka Ain CAA 2019 ka la wanrah ia ka jingsheptieng kaba shong nia jong ki rit paid ha kylleng ka thain Shatei lam mihngi kaba kynthup ia ngi ki khasi jaintia bad Garo. Kane ka Ain ka la pharia ruh bad wanrah ka jingsngewiapher niam bad jaidbynriew ha ka Ri India baroh kawei. Ha kylleng ka Ri India ki samla pule ki longkmie ki rangbah bad ki nonshong shnong ki iakhih bad ieng pyrshah ia kane ka Ain.

Ka Ain CAA 2019 ka ktah jur ia ki nongrim tynrai jong ka Riti Synshar bad kumta ka ktah ia baroh kawei ka Ri. Ki jingiada bad jingpyllait ba shiteng shilliang ia ki katto katne ki Jylla kiba hap hapoh ka sixth schedule ne kiba don ia ka ILP kan ym iarap ei ei, ka dei tang ka jingpynthamme bad jingpynbieij ia ki nongshong shnong.

Ka Sixth Schedule kam don jingiadei ei ei ruh em bad ka CAA 2019; bad kam don kano kano ka paragraph ha ka Sixth Schedule kaba batai shaphang ka jinglong nongshong shnong. Ia ka Citizenship jong ka Ri India la kdew tang ka Part II bad ha ki article 5-11 jong ka Constitution.

Khatduh ngi kyntu ia ki nong shong shnong kin bteng ia ka jingiakhun bad jingdawa ba shongnia bad katkum ki ain bad ki hok ba ka riti synshar ka ai, ba dei ban pyndam noh ia ka CAA 2019.

Ka TUR ka ong donkam ia ka Ri India kaba synshar halor ka nongrim jong ka jingburom kylliang bad jinniewkor ia ki hok bad jinglaitluid jong ki jaidbynriew bad jaitniam bapher kiba don ha Ri India. Ka Synshar khaddar kaba burom bad niewkor ka sain pyrkhat (ideology) jong para nongshong shnong kaba kynthup jong ki ritpaid bad ki tribal. Ka synshar khaddar kaba niewkor ia ka jingsngew bad jingpynpaw jong kiwei.

Ka TUR ka ong ba  donkam ia ka Ri Iindia kaba synshar hok, kaba iada ia ki hok bad kyntiew ia ki rit paid bad ki tribal katkum ba la pruid dak ha ka Riti Synshar. Namarkata ka jingiakhun ban iada, pynneh pynsah bad kyntiew ia ki Tribal, kaba kynthup ia ngi ki khasi, Jaintia bad Garo, kan ym lah ban lait na ka jingiakhun pyrshah ia ki bor bad kynhun kiba thmu ban wanrah tang kawei ka niam, kawei ka kolshor, kawei ka sain pyrkhat bad tang kawei ka rukom synshar ha baroh ka Ri India. Kane ka long katkum ka kyrwoh kaba la phah da ka Mantre Passah bad Kyrsoibor Pyrtuh dkhot jong ka TUR.

What Next?

Recent Articles

Leave a Reply

Submit Comment

*