Shillong, Naitung 19: Ka Co – Ordination Committee jong ka UDP – HSPDP Alliance, kaba la ia shong pyrkhat kam mynta ka sngi ban ia phiah constituency naka bynta ka election MLA 2018, la rai ba ka UDP kan ia khun ha ki 17 constituency, ka HSPDP ha ki 10 Constituency bad 9 tylli ki constituency kin ia khun paralok.
Ha ka jingpynlait khubor mynta ka sngi da u U Dr Kara Shen, Secretary, Co – Ordination Committee.UDP – HSPDP Regional Democratic Alliance, la ong ia kane ka rai la shim ha ka jingialang kaba la long mynta ka sngi ha pdeng kine ki ar tylli ki party.
Ki constituency kiba ka UDP kan ia khun ki long ka, Khleihriat, Amlarem, Jowai, Raliang, Nartiang,Mawsynram, Shella, Pynursla, Nongthymmai, East Shillong, West Shillong, Mawlai, Umsning,Mawhati, Nongpoh, Ranikor bad Mariang.
Ka HSPDP kan ia khun na ki constituency, Sutnga-Saipung, Nongkrem, Mylliem, Mawphlang, South Shillong, Pynthor, Jirang, Nongstoin, Rambrai bad Mawkyrtwat.
Katba ki khyndai tylli ki constituency ba ki hap ban ia khun paralok ki long ka, Mowkaiaw, North Shillong, Mawthadriashan, Mawshynrut, Mawryngkneng, Sohiong, Umroi, Sohra bad Mawkynrew.
Ha kine ki constituency kaba kila pynbna ban ia khun paralok mynta ka sngi, ki don saw tylli ki constituency kiba la mih khmat da ka party UDP bad HSPDP, ki Constituency kiba la mih khmat da ki MLA jong ka UDP ki long ka Sohra, Mawthadraishan bad Mawkynrew, katba ka Mawshynrut la mih khmat da u MLA jong ka HSPDP.
