Shillong, Nohprah 09: U National general secretary jong ka seng BJP u Ram Madhav, u la ong ba ka seng BJP ka dang ia kren bad ka seng NPP ban ia tehlok na ka bynta ka MLA Election 2018 bad kiwei ruh lada don. Kane ka dang long tang ka jingiakren hynrei kim pat ia poi sha kano kano ka rai.
Haba ia dei bad ki kyrtong jong ka seng BJP kaba kan pynieng ha kane ka Election MLA 2018 la ong ba kin sa sdang ban peit bniah ha dien ba la dep wan u myntri rangbah duh jong ka Ri sha kane ka jylla ha ka sngi saitjain ban wan. Ha dien kane kin sa pynbeit ia ki kyrtong.
U tei u nongialam jong ka seng BJP u khot u were ia baroh ki nongialam seng sain pyrthei ki khraw pyrkhat bad ia ki nongialam seng bhalang ba kin wan sha ka party BJP ban pynkhlain ia ki ksang kti jong u myntri rangbah duh jong ka Ri u Narendra Modi na ka bynta ka roi ka par jong ka jylla.
Haba ia dei bad kane ka sorkar Congress kaba la ialam da u Dr Mukul Sangma ka seng BJP ka dang pynkhreh mynta ban sei madan ia ki kam bam klop la kynnoh u tei u nongialam jong ka seng BJP bad na ka liang jong ka BJP kan pynthikna ba u Dr Mukul un nym jop shuh ha kane ka Election.
