Kam long kaba dei ban ia nujor ia ka Election MLA bad MDC ha ka jylla: Neil Antonio

Shillong, Jylliew 16: Ka United Democratic Party (UDP) ka la nang ioh bor ha shwa ka Election sha ka Ing Dorbar ka Khasi Hill Autonomous District Council ha u snem  2019 da ka jingwan pyniasnoh u MDC ka BJP  Malki-Laitumkhrah Constituency u Bah Neil Antonio War.

Haba kren sha ki nongthoh khubor hadien ka jingialang pdiang burom ia u sha ka UDP, u Bah Antonio War u la ong ba u la jied ban pyniasoh bad ka UDP napdeng kiwei pat ki seng sain-pyrthei riewlum namar ba ka dei ka  party kaba la suh thied naduh ki por ia khih ban ioh la ka jong ka jylla ha ka dur ka APHLC.

“Ngi hap ban pdiang ba ka jingshisha ba ka UDP ka don ka thymmei kaba khlain ha kylleng ka jylla haba nujor bad kiwei ki seng sain-pyrthei riewlum. Nga ngeit skhem ba ka UDP kan nang iai kiew ha ki snem ban wan”, la ong u Bah Antonio War.

Ha kawei ka liang u la pynpaw ka jingsngew kmen ban long beit u dkhot ka Central Executive Committee (CEC) jong ka party. “Da kaba don ha ka CEC ngan ioh ka rynsan ban kren ia ki mat kiba ia dei bad ka jylla ryngkat ki MLA kiba don shabar na ka jingpeit ka District Council. Nga sngew ban ong ba ngan ioh ka bynta kaba kongsan ha ka seng sain-pyrthei kum ka UDP”, u la ong shuh shuh.

Haba kylli la u la shah kthong ruh haka seng sain-pyrthei ka PDF, u la ong ba ma u hi u dei u wei na kiba ia don bynta ban thaw ia ka People’s Democratic Front (PDF). “Ka dei ka jingshisha ba ka nga don ha syndah bad u Chairman ka PDF, u Bah Pynshngain N Syiem.

U bah PN Syiem u la wan ia kynduh ba ngan pyniasnoh bad ka PDF. Hynrei nga la randien namar nga sngewthuh ba ki paidbah ka Constituency kin ym mon ba ngan pyniasnoh bad ka party ba thymmai “, u la ong shuh shuh.

Halor ka jingkylli la u Working President u Bah Bindo Mathew Lanong u pdiang ia ka jingwan jong u sha ka party, u Bah Antonio War u la ong ba ka jingïadei jong u bad u Bah Bindo M Lanong ka la long ka jingïadei paralok naduh mynshwa naduh ba u thmu ban iakhun ia ka ilekshon MDC.

“Nga sngew ba u la pdiang ia nga sha ka party”, la ong u Bah Antonio. Haba kylli la kane ka jingwan pyniasoh jong u sha ka UDP ka dei ka jingshim kabu hadien ba u la iakhun na ka ticket BJP ha ka ilekshon MLA ba dang shu dep, u la ong ba kam long kaba dei ban ia nujor ia ka ilekshon MLA ba la dep bad ka ilekshon MDC ban wan ha ka jylla.

“Kam don ka lad kaba biang ba ngan pyniasnoh bad kiwei pat ki party ha Kato la por bad ka lad kaba biang tam ka la long bad ka BJP. Nga la iakhun ia ka ilekshon MLA ym da ka jingthmu ban jop bad ka jingiakhun ka la long ba ngan ioh ka jingiajan bad ki nongthep vote ha ka Constituency “, u la ong.

U la ong ba u la pyrkhat ban pyniasoh bad ka UDP naduh u 2012-2013 hynrei u khlem iohlad. “Lada nga shim ia ka kam sain-pyrthei kum ka kam khaii te lah ban ong ba ka dei ka jing-pyniasnoh ryngkat ka jingthmu shim kabu”, u la ong.

U la ong ba ki paidbah ba bun ha ka jylla kim pat pdiang ia ka BJP haduh mynta bad kan shim por ba ka BJP kan suh thied ha ka jylla. “Nga sngewkmen ba nga la shim ka rai ban pyniasnoh bad ka UDP bad iehnoh ia ka BJP”, u la ong shuh shuh.

 

What Next?

Recent Articles

Leave a Reply

Submit Comment

*