Shillong, K.Lyngkot 20: Ka nongialam jong ka Congress Legislature Party ka kong Ampareen Lyngdoh, kala kam na ki 50 snem jong ka jingioh jylla bapura ka jylla Meghalaya 36 snem la synshar da ka seng Congress bad kala kam ba bun na ki kam pynroi dei kiba la leh da ka seng Congress.
Ka nongialam jong ka CLP ka jer kyrteng ia ki katto katne tylli ki pynroi ba ka sorkar Congress kala wanrah, kum ka North Eastern Hill University, North Eastern Council, North Eastern Indira Gandhi Regional Institute of Health and Medical Sciences Shillong bad kiwei kiwei.
Haba kren ha ki lat pathai khubor ha Congress Bhavan, ka kong Ampareen kala ong ba dei ka Myntri Rangbah Duh ka Ri India ka Indira Gandhi bam kwai ha dwar u blei kaba la wan plie ia kane ka jylla kumba ka long mynta kaba yn rakhe ia ka jingdap 50 snem la shai ka sngi.
Na ka liang jong ka party Congress ka ai khublei ia ki paidbah ka jylla kiba la ai ka jingkyrshan ia ka party ha baroh kine ki snem bad la kyprad ba kin dang ai ka jingkyrshan ia ka party khamtam ha u snem 2023 ba ka jylla kansa leit sha ka election ban jied ia ki nongmih khmat sha iing dorbar.
La ong ba ka party kan sa pynmih ia ki kular election katkum ka jingdon kam jong ki paidbah, ka party Congress ka iohi ia ka jingshah ktah jong ki paidbah na kane ka daw jong ka khangdam kaba la ktah na ka kane ka khlam COVID-19.
La kdew ruh ia ki myntri rangbah kiba la bat ia ka bor synshar ha ka jylla Meghalaya kiba dei na ka party Congress kiba la trei shitom ban tei ia ka jylla kumba ka long mynta kumne, u Captain W A Sangma, Purno A Sangma kiba la bam kwai ha dwar u blei, u Dr DD Lapang, Dr. Mukul, bah J D Rymbai bad u Salseng C Marak.
Ha kane ka sngi la don lang ruh u bah Mohendro Rapsang, bah Kimfa S Marbaniang MLA, u bah PN Syiem bad bah F. Lakadong MDC jong ka KHADC kila don lang ha ka jingiakynduh bad ki pat pathai khubor.
