Shillong, Iaiong 06: U Symbut myntri rangbah ka jylla u Bah Prestone Tynsong u la ong ba kan dang bteng ka jingkhang ban ia rung ia mih ki briew ha khappud. Ka sorkar kala bthah ia baroh ki Deputy Commissioner bad ki Superintendent ki pulit ba kin peitngor bha ia kane ka bynta.
Haba jubab ia ki jingkylli ba kumno ki trok kit dewiong na kiwei ki jylla ki dang ioh ban rung haduh Jaintia Hills, u Symbut myntri rangbah u la ong ba ka sorkar kala bthah ia ki DC bad ki SP ban pynthikna ba ki kali kiba na bar kim dei ban ioh rung la ki dei ki kali kiba rung beain lane kiba biang kot biang sla.
U Symbut myntri rangbah u la ban biang ba ka jingkhang ia ki khappud ban nym shah ia ki briew ban ia rung ia mih bad kum juh ia ki kali lait noh ia kiba la iathuh da ka sorkar. Ki DC bad SP ki dei ban peitngor bha bad ban pynpyrkhing bha ha ki khappud.
Lah ban kdew hangne ba ka seng UHM kala ioh ban bat ar tylli ki trok kit dewiong kiba wan na Assam sha duh East Jiantia Hills District bad kane kala buh ia ka jingkylli hato u dewiong u hap hapoh ki marbam.
