Shillong, Naiwieng 18: Kan long ka sien kaba nyngkong hapdeng ka Ri India bad ka ri Mynamar ba ki shipai jong kine ki ar tylli kin pynlong ia ka jingiakilan metlang ha Umroi, lane kata ka jinghikai kaba kyrpang. Kane ka jingiakilan met kan sdang haduh ka 20 bad kan kut ha ka 25 tarik mynta u bnai. Ia kane la leh katkum ka jingiateh kular hapdeng kine ki ar tylli ki Ri.
Katkum ka jingiateh kular ha pdeng kine ki ar tylli ki Ri ka long ba kin ia pynlong ia ka jingkilan met lang ha pdeng ki shipai jong kine ki ar tylli ki Ri ka ha kaba yn pynlong da ka Red Horns Division jong ka kynhun shipai Gajraj Corps. Ia kane ka jinghikai yn plie ha ka 20 tarik mynta u bnai ha kaba 15 ngut ki heh shipai na Mynanmar kin wan bad 16 ngut jong ka Ri India.
Kumba ka long ki shipai jong ka Ri India ki long kiba la shah hikai kyrpang ha kaba ia dei bad ka jingshakri ka jong ki hapoh jong ka UN Peace Keeping Operation. Ia kane ka jinghikai kaba kyrpang la tip kum ka IMBAX 2017 bad kane ka long ka jinghikai kaba nyngkong eh ban ai jinghikai harpoh jong ka Ri India. Lah ban pynkynmaw ba ia kum kane ka jinghikai ba kyrpang ia ki shipai ha katei ka jaka la sdang bad ki shipai jong ka ri Bangladesh ha ka 11 tarik mynta u bnai.
