Shillong, Nohprah 28: Ha ka sien kaba 8 (Phra) ka Shlem Jingiarap ia kiba duk U Rupang ka la ioh ban sam jingiarap sha ki 7 tylli ki longing kiba dei na ki shnong bapher bapher kiba don ha kane ka ri Lum Khasi-Jaintia. Ki dei ki 7 tylli ki longing ki dei kiba duk na kiba duk tam kiba ka komiti ka la jied ha ryngkat ka jingmynjur lang ki bor shnong.
La sam jingiarap sha kitei ki longing na ka pisa kaba ki paidbah ki la noh synniang bad ka pisa baroh kaba la ioh synniang mynta u snem ka long T.33,533 tyngka bad baroh katei ka pisa kaba mih la thied da ki tiar ki tar bad la ai bai kali ruh ia kitei ki longing kiba la wan shaduh Shillong ban wan shim ia kitei ki jingiarap.
Ia ka jingialang la pynlong ha kajuh ka jaka kaba ju pynlong manla u snem kata ha phyllaw jong ka skul Mawkhar Christian, Shillong. Ha katei ka sngi la wan ban sakhi ia katei ka jingai jingiarap da ki paidbah kiba la noh synniang ha ryngkat ka jingdonlang ki nongpyniaid.
U Principal ka Mawkhar Christian u la long u kongsan ha katei ka prokram kaba lyngkot, la donlang ruh u trai bad u Editor jong u Rupang u bah R Monarch Shabong, ki nongialam jong ka komiti u Babu Kular Khongjirem (Secretary) bah Jied Kurbah ( Chairman) bad ka kong Belbera Wankhar.
Kitei ki 7 tylli ki ing kiba u Rupang u la ai jingiarap mynta u snem, ki dei kiba mad ia kiba bun ki jingeh ki jingjynjar ha la kajong ka jingshem jong ki, don na ki kiba ym lah ban trei ban ktah namar ka jinglong jong ka met ka phad bad la ki jong ki jingshem.
Don napdeng jong ki kiba la pynpaw ba ki lad ia ka jingjynjar jingkordit na ka daw ba ka jingpang jingshitom ka ban ia ki bad baroh kaba ki bylla ki hap ban pynlut ban sumar.
Ki 7 tylli ki longing kiba la ioh pdiang ia katei ka jingiarap na ka Shlem jingiarap ia kiba duk tam ki long ka kong Phibawansuk Kharkongor na ka shnong Nongrim Sadew, Bah Suren bad kong Injona Thangkhiew na Nongkseh-Upper Shillong,Ribaniar Khongmawloh na Phlangtyngor ( Pynursla block), kong Dril Nongsiej na Mawphlang, kong Pdiang Kharkrang na Langwa (Sohiong), kong Phila Lynshing na Khlieh Umrnong (Nongkya-Ri-Bhoi) bad kong Globinda Pale na Kyndong Tuber.
Ki nongkren ha katei ka sngi ki la pynpaw ka jingsngewnguh ia baroh ki paidbah kiba la noh synniang sha kiba duk lyngba ka komiti iarap ba duk jong u Rupang bad ki la ong ba dei lyngba ka jingnoh synniang jong ki ba la lah ban pyntyllun ia kane ka kam la 8 snem kynthih mynta.
La kitbok kitrwiang bad kyrkhu kyrdoh ia baroh ki kti kiba la iarap sha kite ki longing kiba duk khnang ba kin nang lah ban bteng ia ki kam ba bha jong ki ha ki snem ki ban sa wan.
