Shillong, Nailur 14:U myntri rangbah ka jylla u Dr Mukul M Sangma mynta ka sngi u la plie paidbah ia ka iing ba thymmai jong ka Sein Jaintia kaba don ha U Tirot Singh Road, Qualapatty ha ka jingiadon lang u MP jong ka Shillong u Bah Vincent H Pala.
Haba kren ha kane ka jingplie paidbah ia kane ka iing kaba thymmai na ka liang jong u myntri rangbah u la pynpaw ia ka jingsngewkmen ka jong u ba la lah ban aiti ia kane ka iing sha ki paidbah lyngba ka Sein Jaintia, kane ka long ka burom ia ka Sein Jaintia ba kum ka seng ka lah ban ioh ia kum kane ka iing kaba ishongkun.
U myntri rangbah ka jylla u la kyntu ia ka Sein Jaintia ba kan pynim biang ia ki jingialehkai dram jong u men ba rim bajh namar ba lyngba ki drama lah ban hikai pateng ia ki samla ka juk kiba mynta.Da ka jingdon jong kane ka iing kan dang pynbha shuh shuh ia ki riti dustur bad kane ka long ka thung jong ka sein Jiantia.
Ha ka jingkren jong u president ka Sein Jaintia u Bah Toki Blah u la ong ba ia ka seng la seng ha u snem 1947 bad ka iing kaba rim kala ai ka jingshakri kaba khraw ia ki paidbah na ka bynta ki khynnah skul kiba wan na ki liang iing kiba duk ka iing kaba rim ka don ar tylli ki jaka ialehkai badminton bad kane ka jaka mynta kan long ruh ka jaka ai jinghikai ha ka jingialehkai Badminton.
Kiwei kiba la kren ha kane ka jingialang ki long u bah Vincent Pala MP, Bah GS Massar Chairman ka Sein Jaintia Trust, myntri ki kam ialehkai u Zenith M Sangma, u Bah paul Lyngdoh, Bah AL Hek, Bah David Nongrum MLA.
