Shillong, Rymphang 01: U Mynri Rangbah Duh ka ri, u Narendra Modi u la ong ba ka mang tyngka mynta u snem ka iadei bad ka jinglong jingman bad ka jingngeit ha ka roi ka par bad ba ka pyni ia ka jingngeit ka India halade. U la ong ruh ba kan wanrah ia ka jingsngew shngain ha kylleng ka pyrthei ha kine ki por jong ka jingjynjar.
Ha ka jingkren jong u hadien ba la wanrah ia kane ka mang tyngka jong ka Sorkar Pdeng ha ka iing dorbar thawain Lok Sabha, u Myntri Rangbah Duh u la ong ba kane ka mang tyngka ka kyntiew ia ka jingkut jingmut na ka bynta ka Aatamnirbharta bad ka jingioh iashim bynta man u briew ka ri.
U Modi u la ong ba ka nongrim jong kane ka mang tyngka ka kynthup – ka jingpyniar ia ki lad na ka bynta ka roi ka par, ki lad ba thymmai na ka bynta ki samla, ka jingpeit ia ki sap jong ki briew, ka jingdon jingem bad ka jingiarap ia ki kam ba thymmai khnang ba kin lah ban kiew shaphrang.
U Myntri Rangbah Duh u la ong ba ka mang tyngka kan kyntiew ia ka jingsuk ha ka jingim jong ki riew paidbah da kaba pynsuk ia ki ain bad ki kyndon. Kane ka mang tyngka kan wanrah ia ki jingkylla kiba bha ia ki briew, ki nongbei tyngka, ki karkhana bad ki kam ba iadei bad ki jingdon jingem.
U Myntri Rangbah Duh u la ong ruh ba mar sien pyllait ia ka mang tyngka, ki briew kiba bun ki la ai jingiaroh ia ka. U la ong ba ka Sorkar ka la peit bniah ia ki kamram jong ka na ka bynta ka jingpynneh ia ki kam khajna katba ka la pyniar ia ka jingheh jong ka mang tyngka. U la ong ruh ba u dap da ka jingkmen ba ki riewshemphang ki la iaroh ia ka jingshai jong kane ka mang tyngka.
U Modi u la ban jur ha ki kam jong ka Sorkar ha ka por jong ka khlam Corona bad ka Aatamnirbharta da kaba bynrap ba kane ka mang tyngka ka long kaba iaid shaphrang khlem da ran dien. “Ngi la iaid na ka mang tyngka kaba peit ym tang ia ki jingdonkam mynta hynrei kaba peit jngai ia ki jingdonkam ban wan,” la ong u Myntri Rangbah Duh.
Da kaba iaroh ia ka jingban jur ka mang tyngka ha ka roi ka par, u Modi u la ong ba ka la ban jur halor ka jingriewspah bad ka bha ka miat, ki MSME bad ki jingdon jingem. U la iaroh ruh ia ka jingpeit bniah ia ki kam ba iadei bad ka koit ka khiah. U Modi u la ong ba u kmen ba ka mang tyngka ka la peit ia ki jingdonkam ia ka roi ka par ha ki jylla shaphang shathie, ka thain shatei lammihngi bad ka Leh Ladakh.
U ong ba kane ka dei ka sienjam kaba heh ban wanrah ka jingkylla ha ki jylla khap duriaw kum ka Tamil Nadu, Kerala, West Bengal ban pynkylla ia ki sha ki jylla ba khlain ki kam khaii. Kane ka mang tyngka kan iarap ruh ban ioh jingmyntoi na ki lad kiba don ha ka thain shatei lammihngi kum ka Assam.
Ha ka jingkren shaphang ka jingktah jong ka mang tyngka ia ki kam bapher bapher ha ka imlang sahlang, u Modi u la ong ba ka jingban jur jong ka ha ka jingwad bniah bad ka jingsaindur thymmai kan iarap ia ki samla. Ki riew paidbah kin ioh jingmyntoi na ka jingpeit bniah ia ki kam ka koit ka khiah, swachchta, ka bam kaba tei, ka um kaba khuid bad ki lad ba thymmai. Kumjuh, ka jingmang ba kham bun ha ki jingdon jingem bad ki jingpynkylla kan ialam sha ka jingioh kam bad ka jingkiew shaphrang.
U Myntri Rangbah Duh u la ong ba ka mang tyngka ka don bun ki bynta kiba iadei bad ki kam rep bad ka jingkyntiew ia ka jingioh jong ki nongrep. Ki nongrep kin ioh kham suk ia ka jingaishah. La buh ki bynta ban pynkhlain ia ka APMC bad ka Agriculture Infrastructure Fund. “Kane ka pyni ba ngi la peit bha ia ki jingmyntoi ki nongrep bad ki briew kiba sah ha ki jaka nongkyndong,” la ong u Myntri Rangbah Duh.
U Modi u la ong ba la kyntiew arshah ia ka jingmang na ka bynta ki MSME ban kyntiew ia ki lad ioh kam. U la ong ba ka mang tyngka kan wanrah ia ka nongrim kaba khlain na ka bynta kine ki 10 snem ban wan bad u la ai khublei ia ki briew jong ka ri kiba la ioh ia ka mang tyngka ka ban kyntiew ia ka Aatamnirbhar Bharat.
