Katba ka PWD kam pat pynshai yn beteng ka pakhang surok ong ki paidbah ka shnong Mawtap

Mawtap1Sohiong, Jylliew 14: Ki paidbah nongshong shnong jong ka shnong Mawtap kila pynlong ia ka jingpakhang surok la lai sngi lynter mynta ban dawa na ka PWD ba kan pynshai ba balei ka khang ban shna ia ka lynti iaid kjat kaba la shna na ka skhim NERGS na ka bynta ka jingshngian jong ki paidbah ka shnong ha ka iaid ka ieng.

U Bah A War Chairman jong ka Village Employment Council (VEC) u la ong ba ha u u snem 2016 ka shnong kala pan jingbit na ka PWD ban shah ban shna ia ka lynti iaid kjat na ka jaka jong ka PWD. Haba ka shnong kala pan jingbit na ka liang jong ka PWD kala ai da ka jingthoh ba la ai jingbit ban shna ia ka lynti iaid kjat.

Ha dien ba la ioh ia ka jingbit na ka PWD, ka shnong kala leit sha ki bor jong ka Block ban pan ia ka jingiarap na ka sorkar ha kaba la ai jingiarap lyngba ka skhim NERGS, ka jingtrei kala iaid naduh u bnai Risaw jong u snem 2017 ter ter haduh mynta bad ka jingtrei la dep mar shiteng kam shym don kano kano ka jingujor na ka PWD, hynrei kynsan la wan ong ba dei ban sangeh noh.

Kane ka jingwan ong ban sangeh noh ha kaba nyngkong kala long tang da ka ktien na u Executive Engineer jong ka PWD u Bah W R Lyngdoh, na ka liang jong ka shnong kala pan ia ka jingpynshai bad ha dien na ka liang jong une u juh u engineer u la ai da ka jingthoh ban pynsangeh ia kane ka jingtrei khlem da ai ia ka daw balei ka PWD ka pynsangeh ban shna ia ka lynti iaid kjat kaba la pyntrei lyngba ka skhim NERGS.

U Bah War u la ong ba kum ka shnong bad ki nongkit kam jong ka VEC kila leit ban ia kynduh ia u EE jong ka PWD ban ia kren bad ban pan jingpynshai hynrei na ka liang jong u EE um shym la lah ban ai jingshai dei kane ka jingleh jong u EE kaba la pynbitar ia ki paidbah jong ka shnong ha kaba kila shim ia ka rai ban pakhang surok katba ka PWD kam pat ai jingpynshai.

Ka jingwad lad wad lynti jong ka shnong ban ioh ia kane ka lynti iaid kjat ka dei kaba la slem bha namar ha kane ka surok la don bun kiba na shnong kila mynsaw ha ka jingshah lynbub kali namar kam don lynti iaid kjat bad haba ka Block kala ai ia kane ka skhim NERGS ka shnong kala dap da ka jingkmen bad ka PWD ruh kala ai jingbit ban shna ia kane ka lynti iaid kjat ha ka jaka jong ka PWD, ka jaka ba shna ia ka lynti iaid kjat ka dei ka jaka jong ka PWD ym jong no jong no la ban u Bah A War.

U Bah War u la ong ba kane ka jingpakhang surok kala iaid mynta  la lai sngi hynrei na ka liang jong ka PWD haduh mynta ka sngi kim shym la wan ban ia kren bad ban pynshai balei ka khang ban beteng ia kane ka jingshna ia ka lynti iaid kjat kumba kala dep ban ai jingbit bad kaei ka daw ba ka PWD kam lah ban pynshai halor ka jingpynsngeh  ban trei ia kane ka skhim NEGRS, kum ka shnong kan iaid beteng ia kane ka jingpakhang surok katba ki bor jong ka PWD kim pat leit ban pynshai sha ki paidbah jong ka shnong.

What Next?

Recent Articles

Leave a Reply

Submit Comment
*