Shillong, Rymphang 24: U Inspector General jong ki Border Security Force (BSF) u PK Dubey, u la kren shai ba katkum ka “Geneva Convention” ia kaba la shim da ki Ri jong ka pyrthei ba hapoh 150 yard na u Mawthun lane ia kaba la tip kum ka International Border ym lah ban don kano kano ka jingtei thymmai kane ka dei ka rule ba ka pyrthei ka but.
Haba jubab ia ki jingkylli ha kaba ia dei bad ka jingkhang jong ki BGB ia ki nongshnong shnong ha Mutapur ban shna thymmai ia ki phra tylli ki iing bad ban pynkynriah noh ia ki iing kiba don jan jong u Mawthum ia kaba la jia ha ka 7 tarik mynta u bnai la ong ba ha kane ka sngi la ia don lang ruh na ka liang jong ki BSF.
Na ka liang jong ki BSF kila ia kren ia kane ka kam bad ki BGB bad ka ei kaba la ia mynjur na baroh ar liang ka long ba lada ka don kano kano ka jingtei ha khappud hapoh jong ka 150 yard dei ban pyntip sha ki BSF bad ki BSF kin pyntip sha ki BGB ban thikna ba ka jingtei kam ka dei ka jingtei ha kaba ia dei bad ki kam iada ri bad kane kam dei tang hapoh katei ka jaka hynrei kan long ha baroh shilynter jong ka border.
La iathuh ba na ka liang jong ki BGB kila khang ban tei wat ia ka Integrated Check Post ha Tambil ia kaba la buh ia u Mawnongrim da u myntri khynnah ba dei peit ia ki kam poh iing ka Ri India u Kiren Rijiju, ka daw jong kane ka jingshah khang ka long ba khlem ai ia ka jingtip sha ki BGB. Na ka liang jong ki BSF kila dep phah ia ka jingdro baroh sha Bangladesh ha kaba ia dei bad kane ka ICP ha Dawki ynda la ioh ia ka jingmynjur jong ki ynsa lah ban trei.
Haba ia dei bad ka jingker ksainar shiah ha khappud bad ka Bangladesh la ong ba ka sorkar kan pyndep ia kane ka jingker hapoh jongu snem 2019 bad kane ka dei ka hukum jong ka iing bishar ba ha khlieh duh jong ka Ri India bad ki jaka ba dang sah ha Meghalaya mynta ban ker ka long 90 km kata ha East Khasi Hills bad Jaintia Hills.
La ong ba ka sorkar Bangladesh ruh kala shah mynta ban kyntur sha jan jong u mawthum ban ker ksainar shiah tang ba ka jingker kan long tang shi syrtap bad ia kine ki jaka kin dang ia peit ha pdeng ki BGB bad ki BSF. Kumba ka long mynta ka jingiajan ha pdeng kine ki ar tylli ki Ri kala pynsuk ha ka jingiatrei kam ha baroh ar liang.
Na ka liang jong ka Bangladesh ka kwah ban ia pynkhlain ia ka jingiakhaii hapdeng kine ki ar tylli ki Ri khamtam ha ka jingiakhaii ia u dewiong bad u Maw na kane ka jylla Meghalaya sha Bangladesh. Hynrei ia ki kam khaii ia ki martuh pat kila ia rai ban ia treilang ban teh lakam.
