Shillong, Nailur 18: Ha ka por dang step phyrngap mynta ka sngi ha ka por kumba 4.15 baje ei ei mynta ki briew kiba ym lah ban tip kila kawang petrol bom ia ka iing jong u MLA jong ka Shillong West u Bah Paul Lyngdoh u ba dei na ka seng UDP. Ha kane ka jingjia kam shym don kano kano ka jingjia kaba sngewsih.
Ka jingduh ha kane ka jingshah kawang petrol bomb ka dei borti kaba don ha phyllaw bad u rui ba buh ban kjit ia ka umslap. Na ka liang jong ki pulit kila shim khia bha ia kane ka jingjia namar ka jingjia ka jia ha iing jong u nongmih khmat paidbah bad hata ka long hapoh ka Constituency kaba u sah ha Lumkshaid Mawprem.
Haba kren ha u SP News Agency na ka liang jong u Bah Paul Lyngdoh u la kynnoh ba kane ka jingleh baroh ki dei na ka liang pyrshah kiba kawah ban jop ia ka MLA Election ha u snem 2018 da kaba pyndon kam ia kine ki kam pyntriem ban pynsyier pynsmiej ia ki paidbah da kaba ktah ia ka iing sah ka jong u.
