Shillong, Jylliew 03: Mynta ka sngi por kumba 3 baje tam ei ei, ki nongshong Shnong Umkiang, hadien ba ki la iohi ia arngut ki nongtrei NBCC ba wan hiar da ka Night Super,bad rung shapoh ka ing ba ki sah ha Umkiang, mar mar ki la phone sha ki Nongialam Shnong. Haba ka shnong kala tohkit kine ki ar ngut kim don ia ki kot ki sla ban pynshisha ba kila ioh ia ka jingbit hynrei ki don tang ka Tiket ba ki kiew Bus na Guwahati ban leit sha Silchar.
Na ka liang jong ka shnong kala tohkit ia ki la lap ba kim don kano kano ka jingbit ka transit pass, E-pass bala ai da u DC lane ka Advisory certificate bad ka Quarantine booklet, bad ki la iathuh ruh ba ki wan na Guwahati khlem don mano mano ba check ia ki bad ki don tang ka ticket bus kaba dei iaid na Guwahati sha Silchar, hynrei ki dei pynban kiba trei hapoh Meghalaya ha Umkiang ba dei Border Fencing.
Namar ki nongshong Shnong ki la sngewsyier ia kine ki briew, ki Nongialam Shnong khlem shongkli kti ki la pynmih noh ia ki na ka iing ba ki sah bad aiti ia ki sha ka bor jong ka ain Umkiang P.P, East Jaintia Hills District, ban pynphai ia ki sha ka jaka kaba ki wan khnang ba kan long ka jingiada ia ka nongshong shnong bad ia ki ruh kumjuh.
Kane ka jingiohlad jong ki bar jylla ban wan rung beain shapoh Shnong, kan buh jingma ia ka shnong ka thaw bad ka State hi baroh kawei. Ka shnong ka maham jur ia ki bar jylla kiba rung beain shapoh ka shnong ka thaw khlem ka jingtip ka Shnong, namar wat ia ki trai Shnong ruh kim shah ia ki ban wan khlem ka jingtip u Waheh Shnong bad Secretary Shnong, katno tam ia ki briew kiba nabar jylla beain.
Ka dorbar shnong Umkiang ka kyntu jur ia ka Sorkar, ba kan husiar ia kum kine ki jait jingjia kiba ki bar jylla ki rung ki mih katba mon. Lada ka long kumne kan buh ia ka State jong ngi ha ka jingeh kaba khraw. La ong u bah Nicolas Lyngdoh secretary shnong Umkiang.
