Shillong, Nailur 22: Ki shipai BSF kiba don ha Pyrdiwah kila iohi ia ka jingiaid jong ki briew ha khap border bad haba kila isuba ia ka rukom iaid jong ki kila ker kut bad kem ia ki ryngkat kawei ka kali kaba ki pyndon kam kali Alto Maruti -800 kaba don ia u number ML05-Q0551 bad kila kem ia ar ngut ki briew.
Kine kiba la ioh ban kem la tip kyrteng kumu Bah Kolet Khongjee bad u Bah Suhep Khangrom kiba dei na ka shnong Nongtyngur bad na kine kila ioh ban kurup haduh hynniew tylli ki biskit ksiar bad ka dor jong ki kala kot sha ka T.22,65,410 tyngka.
Kine kiba shah kem kila phla ba kila ioh ia kine ki biskit ksiar na u Raja u ba dei na Bangladesh bad ban pynpoi ia ki sha Shillong. Kine kiba shah kem kila phla ruh ba ia kine ki biskit ksiar ki hap ban wan ai sha Shillong.
Ha kawei pat ka jingjia ki BSF kila kem san ngut ki khar Bangladesh na ka shnong Kapasipara. Na ka liang jong ki BSF kila pynjur ia ka jingpahara ha khappud namar ka don NRC ha Assam bad ha ka juh ka por ka jingjia ha Rohingya. Kane ka jingpyrkhing ka long ban ki briew na shilliang u pud kim dei ban ioh rung sha India.
