Shillong, Nailur 22: Ki pulit jong ka Madanriting kila ioh ban kem ia ki ar ngut ki briew kiba don kti ha kaba tuh ia ka Meghalaya Rural Bank, Branch kaba don ha Ksehbilat, kine kiba la shah kem la tip kyrteng kum u Heavy Jones Kurkalang 25 snem na Pomlakrai, Mawtharia bad u Shiningstar Wahlang, 23 snem na Wahkdait,Dong Pata, Madanrting Block-G.
Ki pulit kila iathuh ba ha ka 16/9/2021 ka Branch Manager jong ka MRB Kehbilat kala ujor ba ha ka por 5.15 baje haduh 5.30 baje jan miet kila don ki briew kiba la wan rung hapoh Bank bad kila khang ia ka manager hapoh kamra bad pynbor ia ba kan plie ia ka kamra buh pisa hynrei da ka jingshlur ka khlem plie ia ka kamra buh pisa.
Ha kane ka jingialeh ki nonglute kila ioh ban rah T.10,000/- tyngka bad kila rah ia ki tiar DVR bad ki CCTV bad kane ka jingrah jong ki ia kitiar ka long ban nym lap ba ki lute na kane ka bank, halor kane ka Regional Manager ha ka 17/09/2021 kala ujor ia ka ejahar hapoh Madanriting police Station bad na ka liang ki pulit kila tohkit ia kane ka jingjia.
Na ka jingtrei shitom jong ki pulit, ha dien ba la lap ksai da ki pulit kila leit ban khyra ia ka iing jong u Heavy Jones Kurkalang 25 snem ha ka miet 21/9/2021 ha ka shnogn Pomlakrai, Mawtharia bad ki pulit kila ioh ban kurup ia ki tiar na tynsok ia kiba u la pyndon kam haba leit lute ia katei ka MRB.
Haba ki pulit kila ioh ban kem ia u Heavy Jones Kurkalang na ka jingtohkit jong la phla bad la ialam sha iing jong u Shiningstar Wahlang 23 snem ha ka Wahkdait,Dong Pata, Madanrting Block-G. ia ka DVR bad ia ki CCTV laioh ban tam na ka pung kaba don ha Wahsnait. Ka jingtohkit ka dang iaid ban lap lada dang don shuh kiba ia don kti ha kane ka kam lute.
