Shillong, Lber 18: Ki pulit jong ka East Garo Hills bad North Garo Hills District kila pynlong ia ka jingiakhynra lang ban thwet ia ki briew kiba don kti ha kaba rah bor ia u Monsing Sangma na ka shnong Mejolgre ha ka phra tarik mynta u bnai.
Ha kane ka jingiatreilang jong ki pulit ban thwet ia kine ki nongleh kam sniew la ioh ban kem ia ki, kiba la shah kem ki long u Gilbirth Sangma,u Rakash Sangma, u Seltin Momin, u Toseng Sangma, u Bronson Momin bad u Nisbirth Sangma ia ki la ioh ban kem ha ka sngi thohdieng.
Na kine ki riew sniew ki pulit kila ioh ban kurup hynriew tylli ki pistol, ka khukri, ka magazine bad kiwei kiwei ki tiar pynmynsaw, ka jingthwet jong ki pulit ia kine ki briew ka long halor ka jingshah rah bor jong u Monsing Sangma ha ka phra trik mynta u bnai na ka shnong Mejolgre kaba hap hapoh jong ka Rongjeng Police Station.
Haka jingtohkit jong ki pulit kila phla ba ki la rah bor ia u Monsing Sangma bad shim noh ia ka jingim jong u ha katei ka juh ka sngi bad ka daw kaba kila ai ka long ba kila rah bor bad pyniap ia u ka dei na ka jingiakjia ha ka liang ka pisa pilain.
Da kajingioh kem ia kine ki hynriew ngut la ioh ruh ia ka met jong u Monsing Sangma bad la phah sha Williamnagar Civil Hospital ban leh ia kaba don kam. Ki pulit kila ong ba u wei na kitei kiba la shah kem u Gilbirth Sagma u dei u snar ha ki kam sniew bad u donkti ruh ha kaba pyntbethei bom ha Byrnihat ha u snem 2015. Ki pulit ki don ka jingkyrmen ba ki dang ioh kem shuh ia ki nongialeh kam sniew.
