Shillong, Jylliew 01: Ki pulit kila pynlong ia ka jingtohkit ha kaba ia dei bad ka jingjia ha ha Them Motor kaba la wanrah ia kane ka jingiakhih jong ki paidbah bad ha kane ka jingtohkit ki pulit kila rah ia ki katto kante ki briew bad ha ka jingthoh kit mynta ka ka sngi la ioh ban kem ia u briew u ba la sdang ban shoh ia u nongkhrong pisa jong ka Bus STPS bad ki kyrmen ba kane ka jingiakhih kan sa jai jai noh, la ong u Superintendent of Police East Khasi Hills District Mr Davis N R Marak.
La iathuh ba ha ka jingjia kaba la jia ha ka miet sngi palei, ki pulit kila rah saw ngut ki briew ha kaba ia dei bad ka jingkawang maw. La ong ba wat ha pdeng ba la pynjari ia ka Curfew ka dang beteng ia ka jingiakawang maw bad petrol bombs, u la ong bay n nym lah ban ong katno ngut hynrei la bun kiba la shah rah bad kila don bun ruh kiba la mynsaw ha kane ka jingiakhih.
La iathuh ruh ba ha kane ka jingiakhih ar ngut ki pulit kila mynsaw mynta ka sngi bad na ka liang jong ki paidbah ruh bun kila mynsaw ha ka jingjia ha ka meit sngi palei. Ia mynta la buh shibun ki pulit ha ki bynta jong ka Motphran bad la pynkhlain ia ki jingpahara ha baroh kawei jong ka nongbah Shillong.
Na ka liang jong u Heh pulit u la iathuh ruh ba kila ioh jingtip ba kala don ka jingpyrshang ban thang iing thang sem ha RR Colony, Nongmynsong bad ha kiwei kiwei ki bynta jong ka nongbah Shillong, hynrei na ka liang jong ki pulit ki dang hap ban bishar bniah la kine ki jingjia ki don jingiadei ne em bad kane ka jingiakhih.
Haba batai ia ka jingkia kaba la jia mynnin ka sngi u SP u la ong ba la don ki kynthei ha Them Motor kiba dang tong um bad kala don ka jingiabun nia bad u nongiah jong ka bus STPS ha katei ka jaka. Kine ki kynthei kila kynnoh ia u nongniah ka bus STPS ba la kren ia ki ktien ki bym sngew tynnad ia ki. Ha kane ka por ka la don ka jingiashoh ha kaba lai ngut ki briew kiba don hapoh jong ka Bus kila mynsaw.
Ia kine kiba mynsaw la pynkit sha Civil Hospital Shillong bad la ai jingsumar ia ki, ha dien kanen ka jingsumar la pynlait noh ia ki namar ki shu mynsaw malu mala. Hynrei ha dien kata kila mih ki khubor ki bym dei bad ka sam mih kane ka jingiakhih.
Ia mynta kala don ka jingiakynnoh halor ki jingiakynnoh bad ha kaba sdang na baroh ar liang kila ia mynjur ba kin nym ia ai kano kano ka jingiaujor. Ia kane la thoh hapoh jong ka GD Entry hapoh Cantonment Police Beat House.
Hynrei ha ka por kumba 5.30 haduh 6.00 baje jan miet kala don ka jingialum paidbah da ki briew kiba niah ia ki STPS ha Iew Mawlong bad kila mut ban tur sha Them Motor bad kala don ruh ka kynhun na Them Motor kiba la ia mih hynrei da ka jingpoi biang por jong ki pulit la lah ban tem ia kane ka jingjia ha kaba ki la leit phai noh la ka jong ka jong.
Ha dien kane kila don ki briew kiba la ialum ha Motphran da ka jingthmu ban leit sha Them Motor bad ha ka juh ka por kila don ki briew na Them Motor kiba la rah ia ki tiar pynmynsaw. Na ka liang jong ki bor ba dei peit ia ka shong suk shong sain kila iohi ba kane kan mih ka jingiakajia kumta la ai lathi charged ia ki briew ba kin ia pra na katei ka jaka bad lah ban the lakam ia kane ka jingiakhih haduh ka por 2.30 baje mynstep mynta ka sngi.
Ha dien kata ha ka por 4 baje mynstep la pynjari ia ka Curfew, hynrei mynta ka sngi kala don ka jingialum paidbah bad pynkhein ia ka Curfew haduh mynta ha ki bynta jong ka Motphran bad Mawkhar. Na ka liang jong ka seng ki nongniah kali ka “STPS buses association” kila ujor da ka ejhar mynta ka sngi ha Sadar police station.
U SP u la ong ba ka jingdawa jong kiba bun ban tem ia kane ka jingiakhih ka long ba dei ban pynshitom ia kito kiba don kti ha kaba ia shoh ia dat mynnin ka sngi.
