Shillong, Lber 03: Ki shipai BSF katba ki dang pahara ia ka khappud India Bangaladesh ha ki bynta jong ka Lyngkhat ha East Khasi Hills District, kila iohi ba ki don ki briew ba beh ia ki masi sha ki bynta jong ka Bangladesh.
Na ka liang jong ki BSF kila khang kdong ia kane ka jaka bad kila ioh kem haduh 16 tylli ki masi bad ka dor jong kine ki masi kala kot sha ka T.3.50 lak tyngka. Na ka liang jong ki BSF kine ki nongkhaii beain ia ki masi sha Bangladesh ki long kiba shlur haduh katta katta ba kim salia ia ki BSF.
Kane ka jingioh kem jong ki shipai BSF ia kine ki masi ka long ha ka sngi saitjian por mynsngi, na ka liang jong ki BSF ha ka jingiabeh ban kem ia ki masi kine ki nongkhaii beain kila ioh ban phet hapoh ki khlaw kiba don ha kane ka jaka. Kane ka jingkhaii masi beain ka jia na ki bynta kiba khlem pat ker ksainar shiah.
Ha kane ka juh ka sngi ki BSF kiba don ha Hawaitilla kila ioh ban kem haduh 37 tylli ki masi bad ka dor jong ki kala kot sha T.7.00 Lak tyngka. Na ka liang jong ki BSF kila ong ba namar ka jinglah dor palat ka doh masi sha Bangladesh kala pynlong ia ki nongkhaii beain ba kin nym salia wat la kila shah kem na ka por sha ka por ruh.
