Shillong, Lber 16: Da ka jingiatreilang hapdeng ki shipai BSF bad ki pulit la ioh ban kem ia kawei ka trok kaba don ia u number ML-05-G-7676 na Kurikhal ha jan Ichamati bad na kane ka trok la ioh ban kurup haduh 77 karton ka kyiad phareng kaba la thmu ban phah sha Bangladesh.
Na ka liang jong ki BSF kila ong ba kane ka jingkem ia kane ka trok ka long ha dien ba kila bishar bniah ia ki shallan ba don ha kane ka kali bad la shem ba kala kit tam na kaei kaba la thoh ha ki shallan bad kane ka kyiad kaba la kit don kala shongdor haduh T.2.5 lak tyngka.
Na ka liang jong ki BSF kila kam ba hapoh kane ka shitaiew kaba mynta kala ioh ban kem haduh 200 tylli ki masi kiba la thmu ban pynrung sha Bangladesh, ym tang ki ka masi hynrei kila don kiwei kiwei ruh ki mar khaii tuh bad haba khien ha ka pisa kala kot sha ka T.2 klur tyngka.
Na ka liang jong ki BSF kila pyrkhing bha ia ka jingpahara ha khappud ba khanglad ia kane ka jingiakhaii tuh na India sha Bangladesh. Haba ia dei bad ki mar kiba la ioh ban kurup kila aiti sha ki bor jong ka ain ban leh ia kaba don kam.
