Kham wan sha khmat ki kynthei, ia ki shynrang ha ka jingpule ha India ong u President  

Shillong, Naiwieng 04: U President jong ka Ri India u Ram Nath Kovind ha ka jingkren jong u ha ka jingpynkupburom kaba XXVI ha ki samla pule jong ka North Eastern Hill University Shillong, u la ong ba ka ka long kaei kaei kaba sngew tynnad ka long ba 76% na kiba pass na kane ka skul bah ki dei ki kynthei bad u la ong ba man ki jaka ba u leit ban pynkup burom ia ki samla ha ki skul bah u shem ba ki kham lah ki kynthei ia ki shynrang.

Haba ia dei bad ka NEHU na ka liang jong u President u la ong ba u sngewtynnad ban tip ba ki briew na sha bar jong ka Ri India ruh kila wan ban pule ha kane ka skul buh, kum na Thailand, Bangladesh, Bhutan bad na ki Ri Middle East. Ka long kaba bha ban ia khleh lang.

Na ka liang jong u President u la ong ba ka jylla Meghalaya ka don 80% ki nongrep, ka skul bah ka don ka bynta kaba khraw ha kane ka liang kumno ban wad kilad ki lynti ban kyntiew ia ka rep ka riang na ka bynta ka roi ka par jong ka jylla khamtam ha ka rep ka riang.

U President u la ban jur ba ka dei ka kamram jong ka skul bah ban hikai ia ki khun samla ba kin long kiba lah ban ioh kam ioh jam ha ka rukom hikai bad ba kin lah ruh ban ieng hala ki jong ki khat da kaba ki seng iala ki kam ki jam. U la ong ba ha ka jingialang bad ki Lat jong ki jylla ha u snem 2018 u la ong ba kan bha ia ki samla pule ba kin leit sha ki kinongkyndong ban tip ia ka ki jingshisha.

U President u la ong ba ka jylla Meghalaya kala long ka jylla kaba la maitphang ha ka jingkhuid jingsuba bad ka shnong Mawlyngong kala long ka nuksa, kala don ruh ia ki jingkieng diengjri kane ka kdew shai ia ka jingdei jong ki briew bad ka mairang.Haba phai sha ka rep ka riang, la ong ba u synsar ba mih na ka jylla Meghalaya u don ia ka iew kaba bun bah sha kiwei ki bynta jong ka Ri India.

Haba ia dei bad ki riew pat khmat kiba la mih ha kane ka jylla, u la kdew ia ka kyteng jong u Tirot Sing, u Kiang Nangbah, u Patogan Sangma kine ki dei kiba la ialeh laitluid, u Purno A Sangma speaker jong ka Lok Sabha, u K J Alphone myntri barim ka sorkar u Dr David Syiemlieh Chairman ka UPSC. La ong ruh ba ka jylla Meghalaya kala sei shibun ki rang bad ki thei ialehkai.

Ha ka jingkren jong u Lat ka jylla u Tathagata Roy, u la ong ba dei tang kane ka skul bah ha ka Ri India kiba pule 50% ki dei ki kynthei, u la ong ba ka long kaei kaei kaba don ban ban long ki nong India namar ngi dei ki nongshong shnong bad ha ka juh ka por ban ieit iala ka jong ka thain bad ka jylla.

Ha ka jingkren jong u myntri rangbah ka jylla u Conrad K Sangma, u la ong ba kampher la ki samla pule ki dei kiba ioh takma kisar ne kiba shu pass kaba don kam ka long ba baroh ki don la ka jong ka bynta ban leh. U la ong ba kane ka jingpule kaba ngi pule ban ioh kam mynta kan kylla bad kan poi ka por ba yn nym don kam shuh ruh.

Haba ia dei bad ka ioh kam ioh jam u la ong ba ka sorkar kan nym lah ai kam lut, hynrei ka dei ka kam jong ka sorkar ban wanrah ia ki polisi treikam bad ban kyrshan ha ka rukom seng kam.

U la ong la shai ka sngi un leit sha Bangladesh ban peit kaei kaba ka jylla Meghalaya ka lah ban ia khaii pateng bad ka thie ka Ri. U la ong ba ka khaii bad ka Bangladesh bad ka India kala kot sha ka 10 billion, hynrei ka lynggoh ka long ba ka jylla ka don tang 1% na katei.

U la kyntu ia ki samla pule haba ki leh ia kano kano ka kam don kam ban shim ia ka raikut ha lade bad iaid sha khmat ha kata ka rai,haba leh kumne kan wanrah shibun ka jingeh bad ka jingjynjar hynrei tang kita kiba nud ban leh ki poi sha ka thong.

What Next?

Recent Articles

Leave a Reply

Submit Comment

*