Shillong, Jylliew 09: Ki paidbah nongleit iew leit hat mynta ka sngi kila leit ban siew ban tda khamtam eh hapoh Iewduh naduh ka por mynstep haduh ka por ba ka Curfew kala trei kam biang ha ka por saw baje. Ha kane ka sngi ruh ka iew ka hat khamtam eh ka Iewduh kala iaid beit hapdeng ka jingpynkhlain ia ki bor pahara.
Ki pulit kiba la ai pahara bha ha Motphran, mar ia kut ka por pynlait ia ka Curfew saw baje mynta ka sngi kila khang noh da ki “Barigate” ban nym shah ia ki kali ba kin rung sha Motphran ha dien ka saw baje bad la shah ia ki kali kiba la don lyngba ha ki bynta jong ka Iewduh ba kin mih noh kloi.
Ki paidbah nongleit iew leit hat ruh kiba la ia leit ban thied ia ki jingdon kam jong ki sha la ki iing ki sem khamtam eh mynta ka sngi ka dei ka sngi Saitjain kila ia leit ban siew ban tda da ka jingsuk mynsiem khlem da don kano kano kata ka jingsngewsyier bad kane ka dei ka sngi kaba ar ba ia ka Curfew la pynlait na duh ka por 7 baje mynstep haduh ka por saw baje noh phai sngi ha ki bynta kiba hap hapoh jong ka Lumdiengjri Police Station.
