Shillong, Lber 19: Mynta ka sngi ka seng All Meghalaya Labour Association (AMLA) kala leit ban khang ia ki kali Tourist kiba wan na Assam sha Sohra wat la ka sorkar kala dep ban pynbna ba la khang ia baroh ki jaka jngohkai kiba don ha kane ka jylla Meghalaya.
Ia ka jingpyntip sha ki paidbah ba la khang ia ki jaka jngohkai kiba don ha kane ka jylla Meghalaya la pynmih lyngba ka ophis jong u Director jong ka tnad pathai khubor jong ka sorkar Meghalaya.
Mynta ka sngi ka seng AMLA hapoh ka jingialam jong u president u bah Denny Dunai kila leit ban khang ia ki briew kiba la wan na kylleng ban leit sha ki jaka jngohkai pyrthei bad pynphai ia baroh ki kali Tourist kiba thmu ban leit sha Sohra.
Ka jingkhang da ka AMLA ia ki kali Torusit kala sdang na Hynniewmer nangta ha Mawkdok, ter ter sha Duh Sohra, da poi sha Sohra kala don ka jingiatreilang bad ka TULBA ban khang ia ki kali Tourist bad pynphai noh ia kine kiba wan jngohkai.
Ha kawei pat ka khubor la ioh jingtip ba bun na ki briew na Assam mynta ka sngi kila leit sha ki thain Dawki hynrei da poi sha Pynursla la bat ia ki bad la pynphai noh na Pynursla Police Station.
