Shillong, Naiwieng 30: Ka KSU 
South West Khasi Hills District, ka pynrem jur ia ka jingleh bym suid niew jong ki bank bad ophis bapher bapher kiba don hapoh ka district ki bym shym la burom ia ka sngi shuti jong ka district kiba dei ki sngi kyrpang jongka Jaitbynriew Hynniewtrep Hynniew skum kata ha ka mynta ka sngi, kaba dei ka lyngkhuh sngi iap ba 170 jong u riewkhraw nongialeh laitluid napoh jong ka Hima Maharam,u Sngap Sing Syiem.
Ka Seng, mynta ka sngi ka sngi mar ba ioh jingtip halor ka jingleh bym suidniew jong ki ophis bapher bapher kiba don ha South West Khasi Hills District, hapoh ka jingialam u Samoa Pulljohn Wanniang, Asst. Education Secretary ryngkat ki dkhot na ki circle bad unit ka la leit ban khang khyrdep noh ia kitei ki shnat treikam jong ki ophis bad ki bank kiba don hapoh Mawkyrwat.
Ki banki kiba la shah khang mynta kasngi ki long, ka State Bank jong ka Ri India Mawkyrwat Branch, ICICI Mawkyrwat Branch bad iaka Mawkyrwat Post Office. Ym tang katta ki dkhot jongka KSU South West Khasi Hills District ki la leit ban khang khyrdep ruh iaka State Bank of India Ranikor Branch.
Kumta lyngba jong kane ka kyrwoh, ka Seng ka pynrem jur halor ka jingbym burom iaki sngi kyrpang jongka Jaitbynriew. Ka seng ka dawa pynkynmaw bad maham ia baroh ki ophis,ki bank bad ki shlem pule kiba don hapoh u pud u sam ka district ban burom ia ki sngi shuti kyrpang la ka long jong ka district ne jong ka jylla hi baroh kawei kiba dei ki sngi ba kum ka Jaitbynriew ka ju niewkor.
Na ka liang jong ka KSU jong ka SWKH District kala ong ba nangne shakhmat ka seng kam banse ban hap leh da kaba tyngeh lada kine ki ophis trei kam kim burom ia ka ka sngi ba kyrpang jong ka jaidbynriew la ong u Samla Pulljohn Wanniang, Asst. Education Secretary ha ka kyrwoh kaba la phah mynta ka sngi.
