New Delhi, Iaiong 25: Da kaba pyndonkam kyrkiehia ki bor hapoh ka IT Rules, 2021, ka Tnat Information & Broadcasting, 2021, lyngba ki artylli ki hukum ha ka 22.04.2022, ka la pyllait ki jingbthah ban khangkhathynriew tylli (16) ki channel pathai khubor lyngba ka YouTube bad kawei ka account Facebook
Ki social media account ba la khang ki long hynriew tylli ki YouTube channel pathai khubor jong ka Pakistan bad shiphew tylli ki YouTube channel pathai khubor jong ka ri, kiba don bun tam ki nongpeit haduh palat 68 klur.
La lap ba la pyndonkam ia kine ki channel ban pynsaphriang ia ki khubor thok ba iadei bad ka jingshngain jong ka ri, ka jingiadei ka India bad kiwei ki ri, ka jingsngew iapher jaitbynriew ha ka ri, bad ka shongsukshongsain jong ki paidbah. Ym don ki nongpynmihia ki digital news kiba ai jingtip sha ka Tnat katkum ka jingdonkam hapoh ka rule 18 jong ka IT Rules, 2021.
Ki khubor ba la pynmih da ki channel na India lyngba ka facebook ki iadei bad ka jingkynnoh ba kawei ka jaitbynriew ka dap da ki lehnoh, bad ka pynshlur ia ka jingiaisih hapdeng ki nongbud jong ki niam bapher bapher. Kine ki khubor ki don lad ban wanrah ia ka jingkulmar hapdeng ki jaitbynriew bad ban pynthut ia ka shongsukshongsain.
Ki don katto katne ki YouTube channel kiba na India kiba pynmih ia ki khubor khlem ka jingpynshisha kiba don lad ban wanrah ia ka jingsyier ha ka imlang sahlang.
Ki nuksa ki long ki jingkam bad ki jingkynnoh kiba iadei bad ka jingpakhang dam ha kylleng ka India namar ka khlam COVID-19 kaba buh ia ki nongbylla nabar jylla ha ka jingma, bad ki khubor kiba iadei bad ki jingbyrngem ia kito kiba bud ia katto katne ki niam, ha ryngkat kiwei kiwei. Kine ki prokram ki ktah ia ka shongsukshongsain ha ka ri.
La lap ba ki YouTube channel na Pakistan ki la pynmih lang ia ki khubor hamsaia shaphang ka India kiba iadei bad ki kynhun shipai jong ka ri, Jammu & Kashmir, bad ki briew jong ka ri ha kaba iadei bad ka jinglong jingman ha Ukraine, bad kiwei kiwei.
La lap ba ki jingkynnoh jong kine ki channel kim don nongrim bad ki long kiba ma ha kaba iadei bad ka jingshngain ha ka ri, ka jinglong trai ia la ka ri bad ka jingtylli ka India, bad ka jingiadei jong ka India bad kiwei kiwei ki ri.
Ha ka 23 tarik uApril 2022, ka tnat ka la ai jingmut ia ki TV channel shimet kiba pathai khubor ba kin kiar na ka jingkynnoh kulmar bad ruh ban kiar na ka jingpyndonkam ia ki headline kiba pynshit. Ka Sorkar India ka kut jingmut ban pynthikna ia ki lad pathai khubor ha ka ri kiba shngain bad kiba skhem lada ki long ki kotkhubor, ka television lane ki online media.
