Shillong, Iaiong 01: Ha kine ki khyndait sngi ki briew jong ka tnad khlaw kila leit sha ki jaka tih maw kiba hap hapoh ki ar tylli ki konstitwensi, Mawryngkneng bad Nongkrem ban ai da ka jingthoh ba dei ban khang noh ia ki parmaw ba khlem ioh laisen na ka sorkar.
Ha kine ki ar tylli ki konstitwensi la ioh jingtip ba bun bah ki briew kila ioh da ka jingthoh na ka tnad khlaw ba ki dei ban sangeh bad khlem da ialeh pyrshah kiba pyntrei tih maw kila sangeh noh ia ka jingtrei jong ki ha kane ka kam tih maw.
Ki briew kiba trei ia kane ka kam tihmaw kiba hap hapoh jong ka Mawryngkneng Konstitwensi kila leit ban ud ia kane ka jingeh sha u MLA bad MDC u bah Pyniaid Syiem namar kala ktah ia ka kam ka jam.
U bah Pyniaid Syiem haba kren ha u SP News Agency u la ong ba ka dei ka jingshisha ba ki ophisar na ka tnad khlaw kila sam ia ki jingpyntip sha baroh kito kiba tihmaw namar ba kim don ia ka laisen katkum ki kyndon bala buh da ka sorkar.
Haba ia dei bad kane na ka liang jong u la skhim khia ban peit ba kiba trei ia kane ka kam kin iatreilang bad ka sorkar bad ha ka juh ka por ba kin da apply ia ka laisen na k sorkar ba kin ioh ban bteng biang ia ka kam kaba kitrei, la iathuh ba kila don ki briew kiba la wan ban ia kynduh ia u halor kane ka jingshah khang ki jaka tihmaw.
