Shillong, Iaiong 03: Ka Dorbar Chnong Wapungskur, lyngba u kyrwoh ba la pyllait da u Waheh Chnong jong ka, u Bah Satly Ryngkhlem, kum shibynta ban iatrei lang bad ka sorkar ha ka jingiadei bad ka jingpakhang shnong hapoh jong ka Ri India kum ka jingpyrshang ban tehlakam ia ka jingpur ka jingpang khlam COVID-19, ka la khang pyrshah ia ka rung ka mih jong ki briew baroh hapoh u pud u sam jong ka shnong.
Ka Dorbar Chnong Wapungskur ka la khang pyrshah ia ki briew baroh na bar shnong naduh ba pynmih ia une u kyrwoh, ban rung ban mih hapoh u pud u sam iong ka shnong, lait noh satang ba ki don ki daw bym lah ban kiar, kata ruh yn pdiang tang ia kito kiba ioh jingmit na ki bor sorkar kiba dei peit ia kane.
Ka Dorbar Chnong Wapungskur, ka la khang pyrshah ruh ia baroh ki ki nongshong-shnong jong ka ba kim bit shuh ban mih na la shnong ban leit jingleit shano shano lait noh satang ba don ki daw ki bym lah ban kiar.
Ka Dorbar Chnong Wapungskur ka la kyntu ruh ia baroh ki nongshnong-shnong jong ka ba kin sngewbha ban iashong khop ha la ki jong ki jong ki iing ki sem bad ban kiar na kaba iarung ia mih na kawei ka iing sha kawei pat lait noh satang ba don ki daw bym lah ban kiar.
Ka Dorbar Chnong ka la kyntu ruh ia ki bor sorkar ba kim dei ban ai jingbit kulmar ia kino kino ki briew ki ba wan pan jingbit na ki ban ioh rung shapoh u pud u sam jong ka shnong lait noh satang ba ki don ki daw shisha ki bym lah ban kiar.
Kane ka jingpynbna jong ka Dorbar Chnong kan trei kam na ka bynta jong baroh lang, lait noh na ki briew sorkar, lane kino kino ki briew ia kiba la thung lane bthah hi da ka sorkar ban rung lane mih hapoh u pud u sam jong ka shnong na bynta ki jingdonkam.
Ki kali kiba iaid lynti lyngba u NH-6, u surok u ba sam lyngba ia ka shnong kin lei kin wan kat kum ba la ai bor ia ki na ki bor sorkar hynrei yn ym shah pat ia ki ba ki ieng lane sangeh kulmar hapoh u pud u sam jong ka shnong lait noh satang ba don ki daw ki bym lah ban kiar.Kane ka jingpynbna jong ka shnong kan trei kam tad haduh ban da pynmih jingpynbna da kumwei pat.
Kumta na ka bynta ka bit ka biang jong baroh lang , ka Dorbar Shnong ka la kyntu ia ki paralok baroh najan bad na jngai ba kin sngewbha ban iatrei lang bad ka shnong khnang ba yn lah ban tehlakam ia ka jingpur jong ka jingpang khlam COVID-19. La ong u bah M H Dkhar ha ka kyrwoh kaba la phah mynta ka sngi.
