Shillong, Iaiong 01: ka Deputy Commissioner jong ka East Khasi Hills District ka kong Matsiewdor N War mynta ka sngi kala khaweh ia ka lama shuwa ban sam ia ki marbam sha ki 1500 tylli ki long iing baduk hapoh jong kane ka nongbah Shillong, ia kaba la noh syniang da ka kynhun “Shillong Marwari Community”.
Ka jingsam ia ki jingiarap sha ki 1500 tylli ki long iing kiba duk la aiti sha ka Synjuk ki Khlieh Nongsynshar Shnong ka Bri Hynniewtrep (SNSBH), na ka liang jong ka synjuk kala aiti sha ki shnong ki shnong ban peit kino ki iing kiba don kam shisha ia ka jingiarap ha kane ka por.
Ha ka jingkren ka kong Matsiewdor N War, Deputy Commissioner kala ong ba kum ki nongkhaii kila hap ban peit ba ki marbam ki dei ban poi sha kane ka District, ki marbam ki dei ban biang, nalor kata ki dang lah ban iarap ia ki briew kiba duk ha kum kane ka por.
Na ka liang jong ka DC kala ong ba ka long kaba don kam ban iatrei lang ha kum kane ka por ba baroh ban ia treilang. Baroh ia tip ba ka jingpang COVID-19 ka dei kaba saphriang sted ha satlak ka pyrthei, kaba kongsan ka long ba baroh ngi dei ban im, kaba kham kongsan ka long ba ha kpoh dei ban don ka jingbam bad ymd ei ban don leit ban thiah khlem bam.
Kine ki long kiba suk ban kren, hynrei kam dei kaba suk ban pyntrei kam ia ka, ia kane lah ban leh tang lada iatreilang bad kane ka jingiatreilang ka jia mynta da ka jingiatreilang ki Marwari, ki Rangbah shnong, kila don ruh shibun ki wei ki seng kiba la wan pan jingbit bad don kiwei ruh kiba khlem pan jingbitshuh hynrei kila shu ong ba kin iaid sha khmat ban leit ai jingiarap.
La ong ba don kiba khlem ioh khaw na ki dukan rashon namar ba kim don kard, ki don kiba khlem don pisa shuh ban thied khaw, don kiba khlem ioh shuh namar ba kim ioh shuh wat ha dien ba la ieng lain, kum kine ki jingeh ki mih namar ka pyrthei baroh kawei kam shym la long kiba la pynkhreh halor ka jingwan kane ka jingpang COVID-19 ba kan wanrah ia kane ka jingjulor.
Hynrei na ka liang jong ka sorkar, ki District Administration ki trei shitom ban pynthikna ba ki briew ki dei ban ioh ia ka kam bad ba kin nym leit thiah khlem bam. Na ka liang jong ka DC ka pynpaw ia ka jingsngewnguh iaki Marwari bad kum juh ia ka synjuk ki rangbah shnong.
Na ka liang jong ka DC kala ong ba ki paidbah ki dei ban wan sha khmat ban pyntip namar ka jingdon jong ki ka long ban iarap ia ki paidbah. Haba ia dei bad ki marbam kala ong ba ki don ki jingkynduh ki jingeh kata ka dei ka jingshisha namar liang jong ka sorkar ruh ka dang wat ia ki lat ki lynti kumno ban dang pynbha ban peit ba kan iaid beit.
Ha kane ka jignialang kaba lyngkot la ioh ruh ia ka jingkren na u Kamal Agarwal u wei na ki Marwari, ha kaba u la ong ba ka jingiarap kan long san kilo u khaw shi iing, 500 ML ka Umphniang, shi kilo ka mluh bad shi kilo u dai bad kane ka jingsam kan long ka bynta kaba nyngkong. Ia kane ka jingiarap la aiti sha ka synjuk ki rangbah shnong ba kin peit ia kaba don kam.
Na ka liang jong u Bah R L Blah general secretary jong ka SNSKBH u la paw ia ia ka jingsngewnguh ia ka Shillong Marwari Community ba kila aiti ia kane ka kam ha ka synjuk bad na ka liang jong ka synjuk kala aiti sha ki shnong ban jied ia ki briew kiba don kam shisha ia ka jingiarap.
