Shillong, Lber 22: Ia ka jingianiah saikil lang hapdeng ki shipai jong ka Ri India bad ki shipai jong ka Bangladesh kaba 12 sngi lynter la khaweh lama da u Lt Gen AS Bedi, YSM, VSM, GOC Gajraj Corps na Agartala mynta ka sngi.
Kane ka kynhun shipai ki hap ban iaid lyngba na Agartala, sha Comilla, Dhaka bad Jessore jong ka Ri Bangladesh bad yn pynkut ha Kolkatta bad kine ki nongniah Baiskil kin hap ban iaid ia ka lynti kaba jngai haduh 500 km bad kane ka kynhun kin leit ban jngoh ruh ia ki jaka ialeh thma kiba kongsan kaba la wanrah ia ka jinglaitluid jong ka Ri Bangladesh ha u snem 1971.
Haba kren shuwa ban khaweh ia ka lama u ban iaid ki Baiskil u, Lt Gen AS Bedi, YSM, VSM, u la pynkynmaw ia ka parom hapdeng kine ki ar tylli ki ri bad u la ong ba kumno dei ban kham pynjan shuh shuh ia ka jingiadei ha pdeng kine ki ar tylli ki Ri. La ong ba kane ka jingianiah Baiskil lang kan wanrah ia ka jingiajan kaba kham jan hapdeng kine ki ar tylli ki Ri.
Na ka liang jong ka Bangladesh kala phah ia ka kynhun kaba san ngut ki ophisar na ka kynhun shipai bad kine kila leit kyelleng jong ka Agartala ban peit ia ki jaka tei nam na ka bynta ki shipai kiba aiti ia la ka jong ka jingim ha kaba ia dei bad ka Thma Bangladesh ha u snem 1971.