Khih win ka Meghalaya ba kren u Conrad ia ka “Work Permit” ia ki nong Bangladesh:HNLC

Shillong, Iaiong 13: Bah Saiñkupar Nongtraw Publicity Secretary, HNLC ka seng kaba la shah niew beain ha ka sorkar, ha ka kyrwoh kaba la phah mynta ka sngi sha ki lad pathai khubor , u la ong ba la  iohi ba ka Meghalaya ka lah khihwin tang na ka daw ba u Myntri Rangbah ka jylla  u kwah ban pyntreikam daka ‘work permit’ na bynta ki nong Bangladesh.  Ka jingrung kyrthep ki mynder laka long na kiwei ki jylla ne na kiwei ki ri ym tangba kan ktah iaka iohkam iohjam ne ka ioh ka kot hynrei ka long kumba pynkylla dpei syndon iaka jingbunpaid bad ka tynrai jong ngi  ki trairi trai muluk.

Ha ka kyrwoh u publicity secretary ka seng HNLC, u ong ba la iohi ba kiwei ki ri ruh ki mad ia kane kajuh ka jingeh, kaba pynlong ia u Donald Trump u President ka Amerika ban khang syndon haduh 7tylli ki ri Muslim ba kim bit ban wan iuhkjat ha US. Lada kren kyrpang iaka roi ka par jong ka ioh ka kot, Ki Ri kiba riewspah bad kiba khamrem ka pisa ki khring shibun iakiwei pat ki nongshong shnong kiba na kiwei ki ri kiba duk ban wan kamai ne wan khaii, kumjuh ka khamrem bad khamheh ka pisa India ban iaka pisa Bangla ne pisa Nepal na kata ka daw ngi lap ba ki Nepali bad ki khar Bangladesh ki bun bha ha India.  Ha ki ri kiba duk bad ba tad ka pisa pat ka khring bha tang iaki tourists kiba naki ri kiba riewspah hynrei kiba wan kamai jakpoh ki duna bha.

La kdew ba ha Assembly dang ha kine ki taiew ba ki liang pyrshah ki kwah iakren ktien khasi, ktien Garo baroh baroh hynrei mynba ki dang don pat ialade haka bor kim kwah ba ka ILP ne ka khyrnit kaba phra kan treikam haka jylla, lada phi peit haki TV channel na Mizoram phin nym iohi ba ki Mizo kin kren Hindi ne kin kren English hynrei ki kren beit dala ka jong ka ktien, kane ka dei ka jingiapher hapdeng ki nongthawain ka sorkar Mizoram bad ki nongthaweain ka Sorkar Meghalaya.

Ka jingphet jyndat ka liang pyrshah na Assembly halor ka Work Permit ka long tang ka jingsaitkhmat, isaitmet ban iohi  baka Kong Ampareen ka dang buh jingkylli,  hato ki don ki Nong Bangladesh  ha Meghalaya?

Na ka liang jong ka seng HNLC ka kylli kumjuh, Hato ka don ne em ka ‘Bangladesh Colony’ ha Shillong?.Ka Bangladesh Colony ka dei  ka jaka ha Umpling kaba ki Phetwir Hindu ki jer kyrteng bad ka dei ka jaka ba ki dei ban shong shipor kum ki phetwir katba ka thma pakistan kam pat kut ha u snem 1971,mynba ka Sorkar Congress ka dang don haka bor balei kam shym pynphai noh ia kine ki phetwir hadien ba ka thma ka lah kut katba ka ri Bangladesh haduh mynta ka dang ialeh ban pynphai lut iaki phetwir Rohingya  sha Myanmar hadien ba ka jingsuk ka lah wanphai wat haba ki Rohingya kim shym don la ka jong ka Ri.

Kine ki phetwir na Bangladesh kiba lah sah slem ha Meghalaya ki lah dep ioh iaka jinglong Nongshong shnong ba pura naduh ka por jong ka Indira Gandhi te balei ka liang pyrshah ha Meghalaya kan khuslai sa ia ita i Work Permit haba dei maka kaba lah dep kdup shuwa iaki nong Bangladesh mynta lah 47 snem tam.

Ka Sorkar MDA ha Meghalaya kam dei ban phaikhmat tang sha Bangladesh hynrei kum u Myntri Rangbah  u lah dei ban iakren iaka Sorkar NDA ban phaikhmat  sha Nepal khamtam haba ka Indo Nepal Treaty of Peace and Friendship 1950 ka dang im khlem ka jingkylla bad dei ban pynkut noh ia kane da kaba peit da kiwei pat ki lynti, dei lyngba kane ka jingiatehlok ba ki nong Nepal ki lah ban rung ban mih katba mon na khappud ban wan wadkam wadjam bad ki lah ban shong ban sah ha kano kano ka jylla jong ka ri India.

La iohi ba ka Germany ka tieng ba lada pynkylla ia ki ain ka EU kan nang pynkharoi shuh shuh iaka jingbun ki phetwir, la iohi ba wat ka Ri Britain kaba heh ka kloi ban mihnoh shi syndon naka EU tang namar ba ki paidbah ki tieng bad ki sngew khia jur halor ka jingplie rynghang ki khappud, te sa katno tam ia ki jylla ha Northeast kiba rit khamtam iaka jylla Meghalaya kaba lah dep ban mad teng ia ka jingiaumsnam kaba shyrkhei hapdeng ki khasi bad ki Nepali ha u snem 1987. La iohi nuksa ba wat tang ha khappud Assam-Meghalaya,  ka sorkar Assam ka nud ban pyndonkam daki Nepali ha Langpih ban knieh iaki jaka kiba hap hapoh u pud u sam ka Meghalaya.

Ka jingma na kiwei ki jaid bynriew kam dei tang na kiba na Bangladesh ne u khar Nepali hynrei ka dei ruh na u kiwei ki bynta jong ka  India u ba ban wan kamai jakpoh, uba wan khaii bad uba wan tang ban shong kha, kumta don kam shuwa daka ain kaba skhem hala iing kum ka ILP  khnang ban lah ban tehlakam ia baroh ki briew kiba na sha bar  kampher wat la ki dei ka rong sniehdoh kaba kumno,ki dei naka niam aiu ne ka jaidbynriew aiu, bad kan nym don jingeh iaka Sorkar MDA ban dawa naka Sorkar India ban pyntreikam ia kum kane ka ain khamtam ba u CM ba mynta ka Meghalaya ha kajuh ka por u dang dei u MP uba dang ioh lad ban ia said dalade wat ha Parliament.

Lada u Conrad Sangma ym lah ban leh eiei  ka mut ma u u dei tang u ‘Political Clown’ uba shu pynmyllen iaka Sorkar BJP hangthie ha Delhi . Ka Meghalaya ka lah dep Sakhi ba u CM ubarim u Mukul Sangma lei uba bat arsien ia u lakam synshar   uba tan arsut pynban iaka synshar khadar,  ka ioh ka kot, ka khaii ka pateng bad iaka shongsuk shongsain ha ka Jylla Meghalaya. Kumta ki paidbah ka jylla ki khmih lynti ia kiei kiei kiba khampher bad kiba bha tam na u CM uba thymmai. Ong u Bah Saiñkupar Nongtraw Publicity Secretary, HNLC ja la lyrwoh kaba la phah mynta ka sngi.

 

What Next?

Recent Articles

Leave a Reply

Submit Comment
*