Shillong, Iaiong 04: Ka ophis jong ka Deputy Commissioner jong ka East Khasi Hills District mynta ka sngi kala pyntip ba na ka daw jong ka jingtwa khyndew dew na ka daw jong ka jingslap kila don ar ngut ki briew kiba la duh ei iala ka jingim, kiba khlad dei u Rohit Kshiar 14 snem na ka shnong Mawlat bad Dilibon Tangsan 35 snem na ka shnong Mawkria kiba hap hapoh jong ka Mawkynrew Blok.
Ha ka jingtwa khydnew ha shnong Umblai hapoh jong ka Mawkynrew Blok kila don ar tylli ki iing kiba la shah pynjot ha ka jingtwa khydnew, ki iing kiba la shah lynshop ha kane ka jingtwa khydnew dei jong ka kong Kro Kshiar kane kala duh baroh, katba ka iing jong Phrangki Khongjoh kala shah pynjulor khyndiat. Katba ki dukan pat dei jong ka Sngur Khongjoh bad ka kong Kshonti Mary Khongjoh.
Katba hapoh ka shnong Thangbnai bad Mawlyngot, ha ka jingtwa khyndew kawei ka kali kala shah rong ha kane ka jingjia ym shym don ba mynsaw la bthah ia ki briew jong ka PWD ba kin pynkhuid kloi ia kane ka surok hapoh katei ka shnong, kane ruh ka hap hapoh ka Mawkynrew Blok.
Hapoh ka shnong Lyngshing hapoh ka Mawkynrew Blok ki don saw tylli ki iing kiba la shah pynjulor ha kane ka jingtwa khyndew, ki iing kiba la shah pynjot ki dei jong ka kong Jamin Surong, Kong Judia Nongrum, Kong Kastina Nongrum bad jong ka kong Kyrkhu Longshiang bad jong ka Hame Bina bad kong Hame kala mynsaw na kane ka jingshah pynjot ha ka jingtwa khyndew.
Ka Ophis jong ka Deputy Commissioner jong ka East Khasi Hills District kala phah ia ki briew na Mawkynrew Blok ban pynpoi ia ki lat jong iarap sha baroh ki long iing kiba ngat ha kane ka jingshah lynshop jong ka Mariang.
Ki jingpynjulor ka mariang mynta ka sngi ka long ruh ha Wahumkhrah pyrshah ka shnong Wahingdoh na ka liang jong ka ophis jong ka Deputy Commissioner ka East Khasi Hills la bthah ban shna mardor ia kane ka jingtwa khyndew.
Ha kane ka jingjur palat jong u slap kala don ka jingtwa khydnew ha surok Shillong Dawki na ka liang jong ka ophis kala bthah ia NHIDCL ba ka dei ban buh briew ha surok bah NH-40, mynta ka sngi ki pulit kila iarap ia ki samla pule ban pynpoi sha ki jaka thoh eksamin ka jong kiba la sah kut na ka daw jong ka jingtwa.
Kane ka jingtwa khydnew jala long ruh ha ka surok na Mawphlang sha Balat ha ka kilometer kaba 33, na ka liang ong ka PWD kala trei borbah bad ha ka por jan miet la lah bah pynlait ia ki kali ba kin iaid lyngba kane ka surok.
