Shillong, Naiwieng 05: Ha ka sngi sdang jong ka dorbar Synrai jong ka iing dorbar thawain ka jylla Meghalaya mynta ka sngi kala don ka jingkynmaw burom ia ki nongmih khmat paidbah ha ka Ri India kiba la khlad noh hapoh kine ki san bnai bala leit noh.
Ia kane ka jingkynmaw burom la kren nyngkong da u myntri Rangbah jong ka jylla u Conrad K Sangma ha kaba u la ong ba ha kine ki san bnai kiba la leit noh kila don haduh 39 ngut ki nongmih khmat paidbah kiba la khlad noh, kynthup ia ki ar ngut na kane ka jylla Meghalaya.
Ha ka jingkren sngewlem jong u myntri rangbah u la jer kyrteng ia baroh kiba la khlad noh na ki jylla bapher bapher jong ka Ri India, na kane ka jylla kiba la khlad ki long u Bah HS Shylla, Bah Simon Siangshai, kyntup ia u President ba rim jong ka Ri India u Pranab Mukherjee bad kiwei kwei.
Haba kren ha kaba ia dei bad u bah HS Shylla na ka liang jong u myntri rangbah u la ong ba u bah Shylla u don ia ka sap ban kren bad u dei shisha u nongialam paidbah bad ia kane u shem ha ka por ba u don hapoh jong ka party NPP, haba ia dei bad u Bah Simon Siangshai u la ong ba u dei u briew u ba trei shitom bad ka jingiaiathuh ka dei ha ka por ba u don ha ka NCP.
Ha kren halor u Pranab Mukherjee, la ong ba u president ba rim jong ka Ri India u la long shisha u briew u ba la don slem ha kane ka kam paidbah bad u long shisha u briew ba tbit ha ka baroh ki bynta kiba la bynshed ha u bad u da trei shitom ha kano kano ka kam.
Kiba la ia shim bynta ha kane ka jingpynpaw ia ka jingduh halor ka jingkhlad noh jong ki nongialam jong ka Ri India ki long u nongialam ka liang pyrshah u Dr Mukul Sangma, haba ia dei bad u bah HS Shylla u la ong ba u dei shisha u briew ba khampher namar u dei u nongialam paidbah bad ha ka juh ka por u dei u nongialap niam niar ban don kum une u briew.
Haba ia dei bad u bah Simon Siangshai u la ong ba dei ha ka por jinglong myntri ba dei peit ia ki kam karkhna jong u ba la lah ban wanrah ia ka karkhana shna dewbilat kaba nyngkong ka Star Cement ha East Jaintia Hills District mynta bad u don ia ka rukom pyrkhat ban wanrah ia ki nongseng kam ha kane ka jylla ban pynioh kam ioh jam ia ki samla.
Halor jong u President barim ka Ri India u Pranab Mukherjee, u Dr Mukul u la ong ba u ne u rangbah u don ia ka jingsngewthuh kaba janai ia ka dong shatei lam mih ngi jong ka Ri India bad dei ha ka por jong u ba ia ka skhim shna surok PMGSY la sdang bad ka jylla Meghalaya ka dei ka jylla kaba nyngkong ha NE ban ioh ia kane ka skhim shna surok.
Kiwei ki MLA kiba la ia shim bynta ban pynpaw ia ka jingsngewlem halor ka jingkhlad noh jong ki nongmih khmat paidbah ha kine ki khyndait bnai ki long u Zenith Sangma, Bah Lambor Malngniang, Bah Process T Sawkmie, Bah George B Lyngdoh, Bah Meralborn Syiem, Bah Adelbert Nongrum bad la kren khatduh da u shnongknor ka iing dorbar u Bah Metbah Lyngdoh bad la pynlong ia ka jingsngap jar kaba arminit ban duwai na ka bynta ki mynsiem kiba la khlad noh.
