Shillong Naitung 12: Tang na ka daw jong ka jinglong khlem phikir jong ki briew kiba pom dieng , kawei ka kali Autorickshaw kala noh sha rait, ha kane ka jingjia kawei ka long kmie kala khlad hapoh jaka ai jingsumar, kiwei kiba mynsaw ki kynthup ia ki khun bad ki khun ksiew. Kane ka jingjia ba sngewsih kala jia ha shnong Mawlyndep kaba hap hapoh jong ka Ri Bhoi District.
Ka long kmie kaba la khlad noh ha kane ka jingjia ba sngewsih la tip kyrteng kum ka kong Arbina Ryntathiang kaba na shnong Pyndengnongbri, Mairang, West Khasi Hills District bad ki 6 ngut kiba la mynsaw ki kynthup, ka Ibaphylla Ryntathiang, Batimila Ryntathiang, u Shanborlang Ryntathiang, u Mewanbanshan Ryntathiang 5 snem ka rta, Ericson Ryntathiang 1 snem 9 bnai bad u Samebanteiskhem Ryntathiang 3 snem ka rta.
Kila ong ruh ba ki briew kiba ot ia utei u dieng kila phet krad na katei ka jaka bad kim shym la leit ban iarap ia kiba la mynsaw na ka jingleh khlem akor ka jong ki.Kila iathuh kila mih napoh shnong Mawlyndep ban wan shaw iaka khun kynthei kaba leit sahkai bad la u kurim bad katba ki dang shong ha ka kali kila mad ia katei ka jingjia ba sngewsih.
Wat ka shnong ka thaw kala iarap ban pynkit ia kine kiba mynsaw sha Holy Cross Health Centre kaba don ha Umsaw Khwan, hynrei ka Kong Arbina kala khlad noh namar ka jingban jur jong ka mynsaw ha ka bynta jong ka khlieh. Katba ia ki 6 ngut kiba kynthup ia 3 ngut ki khynnah rit la pynkit noh sha Shillong Civil Hospital na ak bynta ban ioh iaka jingsumar kaba kham bha bad ki pulit ka Umiam Police Station kila pynlong iaka jingtohkit halor katei ka jingjia.
