Shillong, Nailar 16: U myntri rangbah duh barim jong ka Ri India u Atal Bihari Vajpayee 93 snem u la khlad noh mynta ka sngi ha ka por 5.05 baje janmiet hapoh jong ka hospital AIIMS New Delhi. La ong ba u myntri rangbah duh barim jong ka Ri India u la shah sumar ha kane ka hospital la katto katne taiew mynta. la kha ha ka 25 tarik Nohprah 1924 ha Gwalior.
U Atal Bihari Vajpayee u la shimti lai sien kum u myntri rangbah duh jong ka Ri India, ha ka sien kaba nyngkong ba u long myntri rangbah duh u la neh tang 13 sngi ha u snem 1996, ha ka sien kaba ar u la neh 11 bnai kum u myntri rangbah duh naduh 1998 haduh 1999 bad ha uneu juh u snem 1999 u la shim ti biangkum u myntri rangbah duh jong ka Ri haduh ba kut ka san snem 20014.
U myntri rangbah duh jong ka Ri India u Narendra Modi u la pynpaw ia ka jingsngewsih kaba khraw halor kane ka jinglhlad noh jong u Vajpayee bad u la ong ba ka long ka jingduh kaba khraw ia ka Ri baroh kawei, ki nongialam seng sain pyrthei bapher bapher kila pynpaw ia ka jingduh halor ka jingkhlad noh jong u ne u nongialam ba rat bah jong ka Ri.
Na ka liang jong ka seng BJP Meghalaya State Unit, u Bah Shibun Lyngdoh President jong ka seng u la ong ba kum ka party ka pynpaw ia ka jingsngewsih kaba khraw halor ka jingkhlad noh ka jong u myntri rangbah duh ba rim jong ka Ri India u AB Vajpayee. Ka jingduh kam dei tang ia ka party kum u wei na ki nongseng hynrei ia ka Ri hi baroh kawei.
Na ka liang jong ka BJP Meghalaya State Unit ka phah ia ka khubor sngewlem sha kiba ha iing ha sem jong u Vajpayee bam kwai ha dwar u blei bad ki duwai ba u blei trai kynrad nongbuh nongthaw un ai ia ka jingjah thiat ka bym juhkut. Na ka liang jong ka seng kan sa pynlong ia ka jingialang sngewlem na ka bynta u ne u nongialam ka seng ba la khlad noh.
