Shillong, Nohprah 10; U Phadar Joseph Cilia SDB u la khlad noh mynta ka sngi hapoh Nazareth Hospital Shillong, ha dien ka jingshitom kaba la ban ia u ha ka jinglong tynmen katto katne por mynta. Ka jingleit on tep kan long la shai ka sngi ha u Lum jingtep jong ka balang katholik ha Laitumkhrah.Ia ka jinglehniam leh rukom yn pyndep da u Rev Archbishop Dominic Jala sdb.
U Phadar Cilia u dei na ka shnong Malta City khun jong ka Francis bad Michalina Cilia,la kha ia u ha ka 30th Kyllalyngkot 1936 u la pyniasoh ia lade bad kane ka seng niam salesion jong u Don Bosco ha u snem 1954 u la mih na Malta ha u snem 1956 bad la pynkyntang lyngdoh ia u ha Shillong ha u iaiong 1966.
Kum u Lyngdoh Soblei u la trei ha ki bynta bapher bapher jong ka jylla Assam bad Meghalaya Ha u snem 1966 u latrei ha Don Bosco Guwahati, ha u snem 1969 haduh 1970 ha Sohra, 1970 haduh 1972 ha Pynursla, 1972 ha Cathedral Parsih, 1972 haduh 1977 ha Jongsha Parish, 1977 haduh 1980 ha Christ King college ha u snem 1980 haduh 1983 la aiti ban peit ia ka Silesian Training Centre bad ha u snem 1983 haduh kine ki sngi ba khatduh jong u la long u Director jong ka Don Bosco Youth Centre Shillong.
Namar ka kam kaba la aiti ha u kan long bad ki samla, ha kine ki snem u la leh bun ki kam ban ai jinghikai ia ki samla bad u juh pynlong ruh ia ka jingialang jong ki seng niam na ka por sha ka par bad na kine ki kam kiba u la leh ha u snem 2000 ka sorkar Meghalaya kala pynkup burom ia u da ka khusnam “Meghalaya State Award for Social Service”. Kum ka seng Silesian kala pynpaw ia ka jingduh kaba khraw halor kane ka jingkhlad noh u phadar Cilia.
