Shillong, Iaiong 17: Mynta ka sngi kala don ka jingjia kaba sngewnsih ba u wei u samla na ka jylla Tamil Nadu u D. Vishawa ba wan ban ia shim bynta ha ka jingialehkai ha ka “ 83rd Senior National and Inter-State table tennis championships” la khlad noh ha ka jingiatyngkhuh kali ha Shangbalang ha Ri Bhoi District.
Katkim ki khubor kiba la ioh na katei ka jaka la ong ba ha kane ka jingiatyngkhuh kali ka Trok kaba hiar kala tyllun shariat bad ka Tourist Taxi kala julor bad ha kane ka jingjia u D. Vishwa 19 snem nongialehkai Table Tennis bad u nongniah kane ka kali u Dipak Das 35 snem kila khlad noh ha kane ka jingia tyngkhuh kali.
Kiwei ki nongialehkai Table Tennis kiba la mynsaw ha kane ka jingiatyngkhuh kali ki long u R. Santosh Kumar 22 snem, u Arorla Shek 38 snem, kiba don ha ka Tourist Taxi, u D. Kishore Kumar bad u S. Abhinash Prasannaji, ia kine la rah sha Civil Hospital Nongpoh ban ioh ia ka jingsumar.
