Khlem jingtip ki trai jingkieng diengjri mut pynkylla “Heritage Sites ka sorkar: Morningtar

Shillong, Nailur 03: Ka “Living Bridge Foundation” ryngkat ki trai jaka, ki trai Jingkieng Diengjri  kila pynpaw pyrshah ia ka jingthmu jong ka sorkar ban pan ka jingithuh ia ki jingkieng diengjri kum ki “Heritage Sites”.

Haba kren ha ki lad pathai khubor mynta ka sngi ha Shillong Press Club mynta ka sngi u Bah Morningstar Khongthaw bad ki riew rangbah na ki shnong kiba don ia ki jingkieng diengjri kila pynpaw ba ki pyrshah ia kane ka jingthmu jong ka sorkar, namar la khot ia ka jingialang khlem ka jingtip jong ki trai jaka bad ki trai jong ki jingkieng diengjri.

U bah Khongthaw u la ong ba kine ki jingkieng diengjri kiba dei kiba la ioh pateng na ki long shuwa bad kitrai jaka kila ri sumar ia ki, hynrei mynta ka sorkar kala khot ia kita ki stad kiba na sha bar ban wan batai stad ia kane ka jingdon khlem da kynjoh ktien ia ki trai jaka.

Kum ka Foundationb ad ki trai jaka ki pyrshah jur ia ka jingphah jongu Chief Secretary jong ka jylla halor ka jingialang kaba la long ha ka 25 Kyllalyngkot 2018 ba u la lum ia ki riew shemphang ban ia kren ia kine ki jingkieng diengjri khlem da pyntip ia ki trai khyndew.

La ong ruh ba kum ka Fundation, ki trai jaka badki trai diengjri ba kim pyrshah ia ka jingthmu jong ka sorkar ban pynioh ia ka jingithuh “Heritage Sites” ia ki jaka ba don ki jingkieng diengjri hynrei kaei kaba ki pyrshah ka long ba ka sorkar kam shym la kynjoh ktien ia ki trai jaka.

Ka Fundation bad ki trai jaka ki kyntu ia ka sorkar ka dei ban ai jingtip ia kita ki riew shemphang kiba wan lyngba ka Meghalaya Basin Development Agency lada ki leit ban pynlong ia ka jingialang ha ki jaka ba don ki jingkieng diengjri.

Kiwei ki riew rangbah kiba dei ki trai jaka jong ki shnong kiba don ia ki diengjri kiba la ia don lang ha kane ka sngi ki long u Bah Darmaius Rani na ka shnong Khongthong, u Bah Holi War na ka shnong Siej, u Bah Jobenstar Nongkrat na Pynter, bah Morningstar Khongthaw na Nohwet u ba la kren ha ki nongthoh khubor mynta ka sngi ha Shillong Press Club.

What Next?

Recent Articles

Leave a Reply

Submit Comment

*