Shillong, Nailur 26: Mynta ka sngi u lat jong ka jylla u la ai ka jingmynjur ia ki lai tylli ki kommittee pynbeit pud haka kylla kaba ar hapdeng ka jylla Assam bad ka Meghalaya, ba kin ia kren halor ki hynriew tylli ki jaka, ka Langpih ha West Khasi Hills District, Borduar, Nongwah Mawtamur, Deshdoomreah, Block II ha Ri Bhoi District, Block I, Psiar-Khanduli ha West Jaintia Hills District.
Ia ka Kommittee ba dei hong ka Ri Bhoi la khlieh da u symbut myntri rangbah ka jylla u bah Prestone Tynsong kum u shongknor, ki dkhot ki long u bah Dasakhiatbha Lamare myntri, Mayralborn Syiem MLA Nongpoh, bah Jambor War EM,bah Rangkynsai Kharbuki EM jong ka KHADC, u Deputy Commissioner jong ka Ri Bhoi nongkhot ia ka jingialang.
Ha West Khasi Hills District u bah Renikton L Tongkhar myntri sorkar kum u shongknor ka Kommittee, kiwei ki dkhot ki long u bah Macmillan Byrsat MLA, bah Gigur Myrthong, Kimfa S Marbaniang baroh ki MLA, u bah Bajop Pyngrope MDC, u Deputy Commissioner jong ka West Khasi Hills District kum u nongkhot ia ka jingialang.
Ha West Jaintia Hills, u bah Sniawbhalang Dhar myntri kum u shongknor, ki dkhot ki long u Lahkmen Rymbui Minister, bah Comingone Ymbon, bah Nujorki Syngoh MLA, bah Thombor Shiwat CEM ka JHADC, Deputy Commisisoner jong ka West Jaintia Hills District kum u nongkhot ia ka jingialang.
Ki kyndon trei kam jong kine ki Kommittee pynbeit pud ki long ban ia trei lang bad ki Kommittee ka sorkar Assam, ban peit ia ki kyrteng shnong kiba ka jylla Assam ka don bad ia kiba la kam da ka jylla Meghalaya. Ban peit ia ka jinglong ka jaka jong ka shnong bad ka jan shaei.
Ban peit ia ka jingdon jong ki briew jong ki shnong bad ban peit ki dei na ka kynhun kaba kumno katkum ka khana samari, ban shim ia ki jingdon jingem kiba la shna da ki ar tylli ki sorkar ha ki shnong, ban leit sha ki shnong ban ia kynduh ia ki nongshong shnong kyntup ia ki nongmih khmat paidbah, ban buh jingthoh ryntih na ka shnong sha ki jaka ba don ki jaka iarap ka sorkar, kane ka kommittee ka lah ban pynrung shuh iaki dkhot.
Ki Deputy Commissioner kim pynbiang ia ki jongdon kam baroh bad ki Deputy Commissioner jong ki District kin buh ia ka por bad ban pyntip da ka jingiasngewthuh lang bad ki kommittee kiba na ka jylla Assam.
La bthah ba kine ki Kommittee kidei ban ai ia ka kaiphot hapoh ki 45 sngi, ka jingiakren kan long halor ka History, ka jingdon ki jaidbriew, ka jingjan ki jaka na ka jingdon ki ophis sorkar, ka jingiajan bad u pud bad ka jingsngew jong ki briew kiba shong ba sah ha kito ki jaka.
Ha kine ki lai tylli ki Kommittee pynbeit pud ba la pynbna da u Lat ka jylla mynta ka sngi khlem kynthuplang ia ka kyrteng jong u Chief Executive member jong ka KHADC u bah Titosstarwel Chyne , katba u CEM jong ka JHADC u bah Thombor Shiwat la kyntup lang ha ka Kommittee ba dei jong ka West Jaintia Hills District.
